Kòrsou a bira miembro opservadó di World Trade Organization (WTO) na Ginebra, Suisa

Kòrsou a bira miembro opservadó di World Trade Organization (WTO) na Ginebra, Suisa

Geplaatst op 04 March 2020 dor di Ministerio Desaroyo Ekonómiko

GINEBRA- Djamars dia 3 di mart último, Konseho General di World Trade Organization(WTO) a bai di akuerdo pa Kòrsou aksedé e plataforma prestigioso aki komo miembro opservadó. World Trade Organisation ta e organisashon mundial ku ta monitoreá i kordiná reglanan di komersio internashonal i nos miembresia den esaki ta habri oportunidatnan úniko pa nos por desaroyá eksportashon i amplia nos partisipashon den merkado internashonal.

 Na òktober 2019, minister di Desaroyo Ekonómiko, sra Giselle Mc William a hasi un petishon ofishal na WTO na nòmber di Gobièrnu di Kòrsou den kual el a ekspresá Kòrsou su deseo pa bira miembro independiente di WTO. Na desèmber 2019 minister Mc WIlliam a biaha pa Ginebra kaminda pa promé bia den historia di nos pais, komo un mandatario lokal, e por a duna un disertashon na 164 pais Miembro di e Konseho di WTO pa mas aleu vosiferá e aplikashon di Kòrsou pa atkerí miembresia independiente. Despues di a kumpli ku e reglamentunan ku e organisashon ta  eksihí i tambe proveé informashon transparente tokante nos komersio lokal, Kòrsou su petishon pa bira miembro independiente di World Trade Organisation a keda aprobá.

Un di nos metanan prinsipal komo Ministerio di Desaroyo Ekonómiko (MEO) sigur ta keda mihó fasilitá pa medio di e miembresia aki na WTO, esta pa por desaroyá i promové eksportashon. Otro benefishinan ku e miembresia aki ta ofresé ta, e pasaporte pa Kòrsou por realisá akuerdonan komersial ku otro paisnan, spesialmente esnan den nos region, na benefisio di nos pueblo. En prinsipio Kòrsou ya tabata miembro di e organisashon multilateral aki for di 1949 a traves di Reino Hulandes. Sinembargo, miembresia pa medio di Oropa tabata duna e persepshon ku nos pais tambe ta asina desaroyá i donante, lokual tabata stroba nos di haña akseso na mihó koperashon internashonal. Awor, nos miembresia independiente ta habri portanan pa nos komo un isla chikí, vulnerabel ku un ekonomia chikí ku desafionan meskos ku hopi di e otro islanan den nos region. Den su disertashon na e Konseho di WTO na desèmber último, sra Mc William a enfatisá ku “Kòrsou komo isla, chikí i vulnerabel, leu for di Union Europeo mester por defendé su interesnan ku no semper ta e mesun interesnan di Union Europeo”.

Kòrsou su ekspreshon di interes pa bira miembro independiente di WTO ta mustra e relevansia ku un organisashon asina tin pa mundu i ku sea bo ta grandi òf chikí, kada bos tin e mesun balor. E ta un muestra balioso tambe di inklusividat i seriedat ku e organisashon aki tin pa tur pais ku ke amplia nan posibilidatnan komersial. WTO ta rekonosé solamente dos tipo di kondishon pa un pais ta miembro: paisnan ku ta kompletamente independiente i paisnan ku tin un teritorio aduanal separá. Den e kuadro aki Kòrsou su akseso komo miembro independiente di WTO ta duna speransa na otro paisnan i teritorionan ultra mar ku nan tambe por bira miembro i asumí un posishon mas relevante den mundu di komersio internashonal.

E akseso di Kòrsou na WTO lo marka pouta i tin un reto grandi pa nos por kumpli ku e eksigensianan di e organisashon aki. Akseso na WTO ta nifiká ku nos lo tin ku pone nos kushina na òrdu. Nos reglanan di komersio, nos manehonan, nos leinan, kontrol riba kalidat, transparensia di informashon, krea un merkado kompetitivo pa nos empresanan i invershonistanan, i tambe mehorá nos servisio ta algun di e benefishinan ku un akseso na WTO ta enserá. WTO na su turno lo duna apoyo tékniko na gobièrnu di paisnan ku apliká pa bira miembro. Den e kuadro aki tambe MEO a entamá un proseso pa yega na un National Export Strategy (NES) ku sosten di International Trade Center (un supsidiario di WTO i Nashonnan Uní) pa yuda prepará nos pais pa drenta e arena di komersio internashonal ku ta eksigí pa tur pais partisipante ta kumpli ku reglanan i kondishonnan di komersio pa produkto i servisionan. Eksportashon ta nesesario pa pusha e ekonomia di Kòrsou pa bai dilanti i e NES ta e vehíkulo pa yuda logra esaki.
Minister Mc William ta sumamente kontentu ku e miembresia di Kòrsou na WTO i ta finalisá bisando: ““Nos ta aspirá un pais efisiente! Un pais ku ta kumpli ku e reglanan di WTO, ku prosesonan mehorá, i ku ta transparente i moderno. Un pais ku leinan komersial bon definí, institushonnan komersial fortifiká i e kapasidat i konosementu pa por krea e pais kompetitivo, transparente, efisiente i habrí kapas pa negoshá ku paisnan den nos region i tambe di otro áreanan”.

This site uses Akismet to reduce spam. Learn how your comment data is processed.

%d bloggers like this: