Catalogo di Pintura Indjan riba Baranca ta yega Scol!
Catalogo di Pintura Indjan riba Baranca ta yega Scol!
Oranjestad Aruba: Fundacion 1403 ta sumamente contento di anuncia cu den luna di maart tur scol basico, secundario, intermedio y superior lo ricibi un copia di e publicacion ‘The Archaeology of Aruba: The Pictographs and Petroglyphs’ pa nan biblioteca. Ya e prome dialuna di maart Sr. Francisco Croes, na kende e buki aki ta dedica, a cuminsa pasa personalmente na e scolnan pa entrega e regalo y motiva esnan encarga pa haci esaki disponibel pa e alumno y docentenan den e bibliotecanan di e diferente scolnan.
Entre e scolnan cu a ricibi nan ehemplar caba tin Colegio San Antonio, Colegio Conrado Coronel, Maria School, Cacique Macuarima School, Colegio San Hose, Colegio Laura Wernet Paskel y Scol Dun’un man. E buki ta ideal pa uza como fuente di informacion pa desaroya material pa materianan manera historia, geografia, ciencia y arte.
E regalo aki ta posibel danki na un Proyecto di Partnership Comunitario (‘Community Partnership Project’) den contexto di e Metanan di Desaroyo Sostenibel (‘Sustainable Development Goals’) di Nacionnan Uni, cu F1403 y su partnernan a organisa na november/december ultimo. Esnan cu a cumpra un buki den e periodo aki a pone nan nomber riba un sticker cual a ser poni den e buki cu ta regala un scol.
E partnernan envolvi den e proyecto aki a haya un invitacion pa compaña Sr. Francisco Croes na diferente scol durante e luna, enfatisando asina cu e exito di e proyecto aki ta danki na un esfuerso colaborativo di varios institucion.
Riba e pagina di Facebook di Fundacion 1403 por sigui henter luna e entrega na e scolnan. Un cantidad limita di buki ta disponibel ainda pa benta na Museo Arqueologico Nacional Aruba (MANA) y na e librerianan De Wit & Van Dorp y Plaza Bookshop.
Fundacion 1403
