Komishon miksto ta hasi rekomendashon na minister Konket pa ku problemátika di tempu di espera na Ofisina di reibeweis

Komishon miksto ta hasi rekomendashon na minister Konket pa ku problemátika di tempu di espera na Ofisina di reibeweis

Geplaatst op 05 March 2020 dor di Ministerio Maneho di Gobernashon, Planifikashon i Servisio Públiko

Willemstad –    Minister Konket, pa medio di un dekreto ministerial di 5 di febrüari último, a enkargá un komishon miksto pa analisá entre otro e problemátika di retraso i tempu di espera largu pa ku èksamen práktiko di reibeweis. Ademas pa hasi rekomendashonnan kon resolvé un ke otro di forma struktural.  E komishon entre tantu a entregá su rapòrt na minister Konket i a señalá un kombinashon di lo siguiente komo motibu di e retraso:

  • Falta di personal; i
  • Kantidat di persona ku mester repasá èksamen di práktika.

E komishon ta señalá ku ta algun aña kaba ku e Ofisina di Reibeweis ta konfrontá skarsedat di personal. Di e kantidat di 8 eksaminadó di kua e ofisina mester ta disponé, tin dos so den funshon. Tambe t’asina ku e kantidat di kandidato ku ta slag pa èksamen di práktika tabata 57% na 2017, 54% na 2018 i apénas 51% na 2019. Ke mèn ku e kantidat di hende ku mester pasa èksamen di práktika ta bira mas grandi kada bes.

E solushon ku e komishon ta rekomendá ta pa aserká minister di Hustisia pa pone algun agente polisial disponibel pa yuda e dos eksaminadónan ku tin aktualmente. Igualmente pa tuma algun penshonado temporalmente na trabou. Tambe pa permití ku nan ta traha overtaim riba djasabranan. Asina aki lo logra ku riba término korto por despachá e lista di espera. Di otro banda mester tuma paso pa logra ku ta subi e kantidat di kandidatonan ku ta pasa èksamen ku éksito. Ku otro palabra tuma pasonan pa logra ku personanan ku ta inskribí pa pasa èksamen ta realmente bon prepará.  Lo por logra esaki dor di pone eksigensianan di kalidat pa e instruktornan.

Minister Konket ta hasiendo su máksimo esfuerso pa durante luna di aprel ta asina leu ku por duna kontenido na e rekomendashonnan di e komishon di moda ku tempu di espera ta kuminsá baha i yega na proporshonnan normal.

Minister Konket ta gradisí sra. Ruthline Haddocks, sra. Runilla Regina, sra. Janella Nahr-Ricardo, sr. Kennedy Krips, sr. Anralice Dap i sr. Rignald Castillo pa nan trabou balioso. Tambe minister Konket ta pidi tur personanan i instansianan ku ta pendiente pa un solushon di e problema pa tin algu mas di pasenshi.

This site uses Akismet to reduce spam. Learn how your comment data is processed.

error: Content is protected !!
%d bloggers like this: