Mas medida kontra di pueblo, awor ta rekargo riba biahero ku mester generá mas o ménos 5 mion ku lo bia afektá turismo i biahenan di nos yunan di Kòrsou

Mas medida kontra di pueblo, awor ta rekargo riba biahero ku mester generá mas o ménos 5 mion ku lo bia afektá turismo i biahenan di nos yunan di Kòrsou

 

Pa frakshon di MFK un biaha mas gabinete Rhuggenaath pa medio di Minister Zita Jesus-Leito ta bai drenta den saku di pueblo pa saka 5 mion pa Curaçao Burgeraviation Autothority. Esaki komo konsekuensia di mal maneho di gabinete Rhuggenaath, ku a saka 5 mion florin for di Curaçao Airport Partners (CAP) pa a hinka den e bari sin bòm ku tabata yama Insel Air.

 

E pregunta grandi ta kon a para ku e 5 mion ku CAP a pone disponibel pa Insel Air pa medio di Post Spaar Bank (PSB), frakshon di MFK kier sa kuantu ta e pèrdida ku CAP a hiba ku e aventura aki di parti di Gabinete Rhuggenaath pa ku Insel Air.

 

CBA, ya ta risibí pa aña 2 mion florin for di presupuesto di gobièrnu i awor kier pasa un lei ku ta bai duna nan adishonalmente 5 mion florin, miéntras ku te awe Parlamento no a haña un splikashon di kon CBA ta husa e 2 mion ku nan ta haña for di presupuesto di gobièrnu, pa por husga ku di bèrdat e entidat aki tin mester di sèn adishonal.

 

Gobièrnu ta indiká ku ta bin ku e rekargo aki pa garantisá seguridat den aviashon, ku otro palabra e 2 mion ku CBA ta risibí no a wòrdu husa pa garantisá seguridat di e biaheronan, esaki ta algu sumamente peligroso, si ta awor ta bin ku un rekargo pa garantisá seguridat den aviashon. Kòrsou a kaba di pasa den e prueba di ICAO, sin ku Kòrsou a pasa e prueba aki ku éksito i ketu bai nos ta den kategoria II. Kiko gobièrnu kier logra ku e rekargo aki ku pasombra tin un rekargo Kòrsou lo pasa bek pa kategoria I, esaki ta un pensamentu kompletamente robes.

 

E pregunta ta dikon te ku awe CBA no ta dispone di ekspertonan den servisio pa garantisá seguridat den aviashon. Nos mas ku un luna pasa konseho di Minister a aprobá pa un biaha mas buska un direktor pa CBA i ku esaki lo ta un ekstranhero. Ku otro palabra nos yunan di tera ku ta bai studia i otronan ku ya tin eksperensia pa gabinete Rhuggenaath no por hasi e trabou pa nos Kòrsou ku a paga pa nan bai studia. Gabinete nan di turno ya a nombra diferente ekstranhero komo direktor di CBA i Kòrsou no a dal ni un stap dilanti.

 

Ta usa komo argumento ku e rekargo aki mester yuda na un desaroyo duradero di aviashon, awor durante di tur e añanan ku a transkurí kiko a hasi ku e sèn ku gobièrnu tabata duna CBA ku te ainda nos no tin un desaroyo duradero pa ku aviashon, Minister mester aklará esaki pa Parlamento. Ki garantia tin ku ora CBA haña e rekargo adishonal aki lo nos mira adelanto den aviashon.

Gobièrnu ta bin ku rekargo pa CBA, pero e proyekto di lei ta wòrdu presentá na Parlamento sin un konseho di Social Economische Raad (SER), tampoko tin un konseho di Kamara di Komersio riba e rekargo aki. 

 

Frakshon di MFK no por duna su aprobashon na e lei aki sin e konsehonan i mas prinsipal MFK no ta duna sosten mas medida finansiero kontra di pueblo di Kòrsou. Ta basta awor di hinka man den saku di pueblo di Kòrsou pa solushoná problemanan ku gabinete Rhuggenaath a krea, sin buska otro forma pa yega na e fondonan nesesario.

 

Na lugá di bin ku un rekargo, gobièrnu por a buska e sèn den e mundu di aviashon mes, por ehèmpel Dutch Caribbean Air Navigation Service Provider (DC-ANSP) of seka CAH.

 

Gilmar “Pik” Pisas

Miembro di Parlamento pa MFK

 

 

 

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: