MINISTER XIOMARA MADURO: GOBIERNO TA TUMA PASONAN SEGUN PRIORIDAD PA ENFRENTA E CRISIS DI COVID-19
MINISTER XIOMARA MADURO:
GOBIERNO TA TUMA PASONAN SEGUN PRIORIDAD PA ENFRENTA E CRISIS DI COVID-19
Oranjestad – Durante e Reunion Publico pa trata Presupuesto 2020 Minister Maduro a duna un splicacion tocante di e pasonan cu Gobierno ta tuma segun prioridad pa enfrenta e crisis di COVID-19.
Scenarionan di e impacto financiero y economico
E mandatario a informa cu e prome paso cu Gobierno a tuma ta pa haci scenarionan
visibel di e impacto financiero y economico pa Pais Aruba. Expertonan financiero y economico a inventarisa e efectonan cu e crisis di COVID 19 lo bay tin riba Pais Aruba. E profesionalnan a haci uso di e Cuentanan Nacional cu a ser publica aña pasa pa Oficina di Estadistica y tambe a haci uso di e modelo macro economico MARUBA desaroya pa Departamento di Asuntonan Economico pa por a haci e pronosticonan economico necesario.
Busca fondo pa stabilisa e sistema
Di dos paso cu Gobierno ta tuma ta pa busca e fondonan necesario pa stabilisa e sistema di seguridad social pa asina sigura entrada pa SVB, AZV y Gobierno. Banda di esaki Gobierno kier brinda alivio na esnan cu ta perde trabou y na negoshi chikito y mediano. Gobierno lo busca e fondonan aki riba mercado internacional y lo pidi ayudo tambe na Hulanda pa por haya fondo di ayudo y/of fianza. E mandatario a informa cu Banco Central di Aruba tambe a traha su analisis economico y financiero di e efecto di Covid19 y a brinda su conseho na Gobierno riba e fondonan cu Aruba por busca via Hulanda.
Baha gastonan di gobernacion
E di tres paso cu Gobierno ta tuma ta pa baha e gastonan di gobernacion y adapta
esakinan na e realidad nobo cu Pais Aruba ta bay haya su mes aden. Dentro di poco
Gobierno lo presenta e detayes di e decisionnan cu ta bay wordo tuma pa baha gasto di
personal y gasto di servicio y producto.
Apoderacion pa busca fondo nesesario
E ta masha importante pa pasonan 1 y 2 keda ehecuta cu prioridad. Pa ehecuta e pasonan 1 y 2 ta necesario pa Gobierno haya apoderacion di Parlamento pa por bay busca e fondonan necesario. Awor cu Presupuesto 2020 a keda aproba pa Parlamento, Gobierno ta aserca Conseho di Minister di Reino pa haya e apoderacion conforme articulo 29 di Statuut pa subi mercado internacional y sigura e fondonan pa satbilisa e sistema di seguridad social y brinda alivio pa e promer 3 luna. Gobierno na mesun momento ta aserca Hulanda tambe a base di articulo 36 pa por haya e fondonan necesario pa por enfrenta e COVID19 crisis. Manera cu keda cla cu esaki, Gobierno lo pasa pa tuma stap 3 pa adapta e gastonan di Gobierno na e realidad nobo pa nos Pais.
