Dikon gobiernu ta skonde un fondo di mas ku 130 mion ku ta un “Wettelijke Reserve?

Dikon gobiernu ta skonde un fondo di mas ku 130 mion

ku ta un “Wettelijke Reserve?

 

E fondo aki ta suponé di sirbi pa e situashon aktual di COVID-19 (Pandemia)

 

Ta in-solito lokual ku ta pasa na Kòrsou, ta p’esei Hulanda ta ranka orea di di nos gobernantenan, ora ku tipo di kosnan aki sali na kla.

 

Konforme lei SVB tin e deber di reserva un montante tur aña, kual mester ta disponibel na momento ku tin situashonnan ku por trese e diferente fondonan ku SVB ta manehá den problema.

 

Tur aña SVB mester hinka den e fondo aki entre 18 pa 20% di e gastunan di e fondonan. Na e momentu aki e fondo di reserva mester ta dispone di alrededor di 130 mion florin.

 

Pakiko un “Wettelijke Reserve”;

 

• E meta di tin un “Wettelijke Reserve” ta pa tapa rísikonan finansiero a korto plaso. 
• Pa mitigá subida abrupto di e gastunan den SVB, a konsekuensia di por ehèmpel un epidemia o pandemia;
• E “Wettelijke Reserve”, básikamente ta pa tin un provishon (voorziening) pa ora di un kalamidat.

 

Ta bon pa enfatisá ku lei ta preskribí ku asina ku e reserva aki baha bou di e nivel finansiero manera indiká den e ordenansa di pais Kòrsou, SVB mester pone e fondo bek na e nivel manera indiká den e ordenansa. Esaki ta un obligashon pa lei i esaki mester mester tuma lugá for di fondonan di e primanan ku ta drenta.

 

Frakshon di MFK kier sa ta dikon gobiernu no a trese dilanti e fondo aki di e “Wettelijke Reserve”,  komo un di e fuentenan finansiero ku por yuda komo alivio pa e aspektonan finansiero ku COVID-19 a krea.

 

E nivel di e “Wetteleijke Reserve” ta ankra den un ordenansa (Landsbesluit) di pais Kòrsou, na 2012 e nivel ta basá riba 50% di e gastunan di e último 5 añanan ku a transkurí. Na 2012 e ofisina di Actuaris Keesen riba petishon di direktor di SVB a duna un konseho ku por baha e reserva ku tabata ser aplika di 50 % bai na un porsentahe di entre 18 pa 20% (wak e konseho athunto di e Keesen Actuarissen). Na 2012 tabatin 79.5 mion florin den e fondo, esaki segun Keesen Actuarissen.

 

Awe frakshon di MFK ta na altura ku e “Wettelijke Reserve” aki, ta mas ku 130 mion florin i nos ke sa ta dikon;

 

• Awor ku nos ta den e kalamidat aki di COVID-19, kiko ta e motibunan ku Gabinete Rhuggenaath no ta usa e miónes nan ku tin den e pòchi aki di e “Wettelijke Reserve”?
• Ta konsiente on inkonsiente kier skonde informashon rondó di e pòchi aki pa pueblo di Kòrsou?
• Kiko ta òf ta pasando presis ku e sèn ku tin den e pòchi aki?

 

E kos di mas mihó ku por a hasi, ta pa e gremio komersial keda sin paga (draag af) e primanan di ZV/OV, AOV i AWW pa e próksimo 3 luna i esaki lo krea espasio real pa e doño di trabou por hala rosea i mantené tur kupo di trabou. Esaki debí ku e “Wettelijke Reserve” lo a dek e parti aki i ta p’esei e pòchi aki tei.  

 

E “Wettelijke Reserve” aki no ta eksistí pa tapa burakunan den presupuesto, e tei pa dek e gastunan di e primanan di SVB na momentu di un kalamidat i ku posiblemente pago di e primanan no ta drentando manera debe ser.

 

Of gobiernu ya a mishi ku e fondo aki i e no ta disponibel mas?

 

Atentamente,

 

______________

Charles Cooper

Parlamentario pa 

Frakshon di MFK