Parlamentu ta trata lei di petroli mientras pueblo ta pasa hamber!

Parlamentu ta trata lei di petroli mientras pueblo ta pasa hamber!

Ku hopi indignashon Partido KEM a tuma nota di otro akto insólito di e gobièrnu aktual. Pais ta den krisis, pueblo ta yora, varios siudadano a publiká video riba retnan sosial ekspresando nan desesperashon i sklamando pa yudansa. Bastante hende ta pasando hamber i en bes di tene un reunion di parlamento pa trata entre otro e kordinashon di e yudansa na pueblo, ke lanta un otro N.V. pa atende petroli.

KEM ke suprayá ku sektor petrolero na Kòrsou ta sumamente importante, pasobra e por ta di benefisio finansiero, ekonomiko pa pueblo si esaki wordu atende na un manera sinsero, TRANSPARENTE, i ku e pensamentu ku benefisio pa pueblo ta sentral.

Petroli ta un tópiko importante, pero ta ki prioridat tin ku dun’é den e situashon di krisis aki? No por a trata e tópiko aki despues, aki dos of tres luna. Sigur si tene kuenta ku ta años kaba e tópiko aki ta den tapara. Of kisas gobièrnu ker hasi uso di e tempu di krisis aki, kaminda pueblo su atenshon ta riba sobrebibensia, pa a pasa pueblo un fastball.

Na opinion di Partido KEM, na e momento aki: “Sobrebibensia di pueblo ta prioridat!

KEM ta pidi Parlamento pa yama un reunion pa atende kordinashon i kontrol di e yudansa pa pueblo.

Tambe Partido KEM ker suplika gobièrnu pa por fabor no nombra otro kompinchi polítiko komo direktor di e N.V. nobo aki, ku un salario astronómiko. Den media Partido KEM a komprondé ku tin intenshon di nombra un persona ku den pasado a fungi komo president di MDPT i ku no a resultá.

Partido KEM ta puntra dikon semper ta mesun grupito ta haña oportunidat? Nos no tin niun otro hende ku e ekspertisio nesesario aki na Korsou? Dikon no un proseso di reklutamentu i selekshon òf manera ta bisa na Ulandes “werving en selectie”? Na opinion di Partido KEM un proseso di werving en selectie transparente mester por i mester hasi’é.

Partido KEM, Kòrsou esun Mihó, tei pa Pueblo i lo sigui vigilá ku wowo di falki pasonan ku e gobièrnu aktual ta tuma ku ta kontra di interes di pueblo!