Akohida di mucha den situashon insigur na kas
Akohida di mucha den situashon insigur na kas
Mas o ménos 80 mucha vulnerabel ta na kas den un situashon insigur komo konsekuensia di e krísis di corona. Ta duna e muchanan aki akohida den un akohida di emergensia pa mucha, pa asina por tene konsiderashon ku tantu e mayornan komo e muchanan pa e preokupashonnan di kada dia. OLB, Reino i NGOnan lokal ta kolaborá pa sostené famianan ku yu den e tempu difísil aki.
Tambe pa motibu di konsekuensianan sosial ekonómiko di e krísis di corona kombiná ku e medidanan di ‘social distance’, e strès ta oumentá den hopi famia. Famianan ta haña nan ku pèrdida di entrada òf preshon èkstra pasobra nan mester kombiná trabou i yu na kas. Adulto i mucha tur ta sinti falta di nan kontaktonan sosial i posibilidatnan di rekreashon pafó di kas. Komo famia nan ta dependé di otro. Esaki ta pone ku den famianan por surgi tenshon èkstra, iritashon i eskalashon.
Mucha i famia vulnerabel
E preokupashonnan di profeshonalnan ta bai espesialmente pa mucha i famia vulnerabel ku por ehèmpel tin di hasi ku un limitashon, violensia doméstiko, kas chikí (malu), pobresa, mayornan ku adikshon òf problemátika sikiátriko. E muchanan aki tin di hasi ku un situashon na kas ku no ta seif. Normalmente skol, akohida di mucha i klup di deporte ta forma ‘lugá seif’ pa e muchanan aki, kaminda nan por ta mucha i nan por kita un ratu di e tenshon na kas. Awor ku e lugánan aki a kai afó pa e grupo di mucha vulnerabel, nan bida a bira hopi mas pisá. Ademas skol, akohida di mucha i klup hubenil hopi bia tin un funshon pa señalá tambe. Awor ku e lugánan aki a sera, e organisashonnan di ayudo ta pèrdè e muchanan vulnerabel aki for di bista mas lihé.
Akohida di mucha di emergensia
Aktualmente mas o ménos 80 mucha vulnerabel den un situashon insigur na kas ta haña akohida den e Akohida di Emergensia di Mucha, pa asina aliviá tantu e mayornan komo e muchanan. E profeshonalnan tabatin e muchanan na bista kaba. E akohida di emergensia diario pa e muchanan aki ta reglá via e tim ku tambe ta kordiná e Akohida di Emergensia di Mucha pa grupo di trabou vital i krítiko.
Mester di yudansa di un i tur
E situashon di corona ta hasi bida mas difísil pa tur hende, pa mucha tambe. Profeshonalnan ta apelá na tur hende pa yuda otro pa salbaguardiá e muchanan awor ku skol, akohida di mucha i klup hubenil a kai afó. Ofresé bo bisiña òf famia pa bo duna un man kaminda por òf rekurí na ayudo òf konseho di e organisashonnan di ayudo si bo ta kere ku ta nesesario.
Organisashonnan di ayudo ta ofresé ayudo preventivo
Pa famianan ku ta lucha ku tenshon i eskalashon, organisashonnan lokal ta ofresé sosten preventivo. Nan ta alkansabel telefónikamente den dia. Tambe nan ta prepará material di informashon ku tep pa famia ku komo konsekuensia di e situashon di corona ta lucha ku problemátika doméstiko.
