Komunikado ABC tokante transporte di e profeshonalnan for di Merka

Komunikado ABC tokante transporte di e profeshonalnan for di Merka

Willemstad – Djaweps 23 di aprel último, Autobusbedrijf Curaçao (ABC) a transportá médiko i enfermeranan profeshonal for di Curaçao Int.Airport pa nan hotèlnan den Otrobanda. Un di e personanan aki a tèst positivo pa e vírùs di COVID-19.
Gerensia di ABC ta informá ku a kumpli ku tur e protokòl di COVID-19 instruí dor di GMN. Esakinan ta enserá:

1) ABC a transportá e pasaheronan ku bentana habrí.
2) ABC a kita e turnikèt di parti patras pa di e forma aki hasi e entrada posibel pa tur pasaheronan di parti patras.
3) Pasaheronan a desinfektá nan mannan promé ku nan drenta konvoi.
4) E konvoinan di ABC tin un sinta hel mará na e dos reinan di stul patras di shofùr pa mantené e distansia sosial.
5) Tur pasahero i inkluso ABC su shofùrnan tabata tin tapa boka (mondkapje) bistí.
6) Kada pasahero mes a atendé ku nan ekipahe na momentu di drenta konvoi i tambe ora nan a yega nan destinashon.
7) ABC su konvoinan ta keda desinfektá tur anochi ku produktonan speshal pa kombatí e vírùs di COVID-19.
8) Asina e konvoinan a drenta garashi di ABC nan a keda desinfektá mesora pa e kompania di limpiesa ku ta enkargá ku esaki.

GMN a evaluá kon e protokòl a keda siguí na momentu di transportá e grupo di profeshonalnan for di Merka i a konkluí ku no tin e nesesidat pa ABC su 5 shofùrnan i tur e otro servisionan ku tabata envolví bai den karentena. GMN, riba petishon di ABC, lo bai duna seshonnan di informashon dediká na tur empleado di ABC ku ta interesá di tur lokual ta trata e tema di COVID-19 i su transmishon.