Atvertensia pa weganan di piramit i otro ofertanan froudulento durante di krísis di COVID-19
Atvertensia pa weganan di piramit i otro ofertanan froudulento durante di krísis di COVID-19
Willemstad/Philipsburg – Centrale Bank van Curaçao en Sint Maarten (CBCS) ta atvertí komunidat pa ofertanan froudulento, manera weganan di piramit i otro trampanan di invershon durante di e krísis di corona (COVID-19). E ofertanan aki ta hasi uso di e pandemia di COVID-19 pa perhudiká personanan desprevení òf vulnerabel, teniendo na kuenta ku den tempunan di stagnashon di ekonomia i krísis, personanan por ta mas inkliná pa trata na traha “plaka fásil”.
Un wega di piramit ta un tipo di invershon froudulento ku ta brinda ganashi dor di rekrutashon di mas partisipante den e programa. CBCS un bes mas ta alerta públiko pa e siguiente karakterístikanan di weganan di piramit: 1. Énfasis riba rekrutashon; 2. Rendimentu haltu riba término kòrtiku; 3. Konstrukshon kompliká pa pagamentu di komishon; 4. No tin un produkto òf servisio real ku ta wòrdu ofresé; 5. ‘Sèn fásil’. Por fabor tuma nota ku skemanan manera Coin1, por ta violando lei dor di evitá rekisitonan legal manera petishon pa un lisensia di CBCS pa rekoudá fondonan bou di públiko ku meta pa hasi un invershon kolektivo. Esaki ta un echo kastigabel ora hasi esaki sin un lisensia di CBCS.
Ademas, CBCS ta konsiente ku e impakto di e situashon rondó di COVID-19 i e vulnerabilidat di personanan ku por a keda afektá ekonómikamente pa e medidanan di COVID-19.
CBCS ta atvertí pa e siguiente trampanan, ku ta kapitalisá riba e konsternashon kousá pa e pandemia di COVID-19:
-Trampanan pa Traha for di Kas: estafadornan ta abusá di personanan ku ta buska oportunidatnan di entrada alternativo durante di e medidanan di COVID-19.
-Trampanan di Fiansa Personal: estafadornan ta hasi uso di preokupashon pa e situashon ekonómiko aktual pa atraé personanan den forma di un instituto finansiero pa pidi informashon personal i finansiero sensitivo.
-Mensahenan fake di gobièrnu: estafadornan ta aserka personanan den forma di representantenan di gobièrnu ku ta duna asistensia pa pidi detayenan personal i finansiero.
CBCS lo sigui entamá pasonan preventivo i represivo pa para weganan di piramit i otro trampanan di violá lei i reglanan di CBCS dentro di e hurisdikshon di Kòrsou i Sint Maarten. P’esei, si bo ta sospechá òf ta na altura di skemanan di invershon froudulento na Kòrsou i òf Sint Maarten, nos ta urgi bo pa tuma kontakto ku CBCS na number di telefòn +5999 434 5500 òf via e-mail info@centralbank.cw.
Finalmente CBCS ta rekomendá públiko pa konsultá su wèpsait https://centralbank.cw/warningnotices1 pa informashon resien riba edukashon di invershon i anunsionan di atvertensianan.
Willemstad, 28 di aprel 2020 CENTRALE BANK VAN CURAÇAO EN SINT MAARTEN
