Trabounan na nos Parke di Palu di Mangel 2 a kuminsá
Trabounan na nos Parke di Palu di Mangel 2 a kuminsá
Willemstad – Komo parti di desaroyo di henter e área di Rif, e proyekto pa krea e di dos Parke di Palu di Mangel (‘Mangrovepark 2’) a kuminsá. Por mira trabounan tumando lugá den e área kaminda ta limpia (‘bagger’) pa un mihó sirkulashon di awa. Esaki sigur lo kontribuí na alsa pues e kalidat di nos medio ambiente. Trabounan ta na enkargo di e kontratista HeuvelmanIbis.
Parke di Palu di Mangel 2 ta e di dos parti ku tin palu di mangel kual ta entre Corendon ku e edifisio di Caribbean Medical University, ántes konosí komo ‘Coney Island’. Den e área aki, lo por kayak tambe meskos ku den e Pparke di palu di mangel 1. Pues e proyekto aki sigur ta un joya pa nos Rif.
Programa Rif ta parti di e akuerdo di kresementu di Gobièrnu di Kòrsou, kual ta un prioridat pa duna estímulo na nos sektor ekonómiko. Pa e motibu aki, a aloká fondonan nesesario pa finalisá e henter e programa. Den kuadro di COVID-19, e programa a eksperensia sierto retraso, pero a kontinuá mesora despues ku ‘lock-down’ a terminá. Asina por a mira trabounan a ranka sali.
E programa den su totalidat, manera anunsiá den pasado, ta konsistí di 6 proyekto i kada un tin nan planifikashon, i Gobièrnu ta perkurá pa tur proyekto kuminsá i terminá. E proyektonan di Gobièrnu ta:
- Parke di palu di Mangel 1
- Parke di palu di Mangel 2
- Konekshon entre e parkenan
- ‘Visitor center’ parke di palu di mangel 1
- ‘Ontsluitingsweg’ Noord-Zuidweg
- ‘Ontslutingsweg’ Oost-Westweg
- ‘Gemaal en persleiding’
Tambe tin proyektonan di sektor priva, kual ta:
- Hotèl Corendon Mangrove Beach Resort
- Hotèl Courtyard Marriot
- Hotèl Renaissance
Komo parti di e proyekto Parke di Palu di Mangel 1, ta limpiando henter e área entre Pisina Benny Leito i Corendon. Por mira ya kaba un klaridat den e área, i poko-poko pero sigur ta traha pa purifiká e awa. A kita palunan di mangel ku tabata den hopi mal estado debí na e gran kantidat di kontaminashon den e awa ku pa añanan largu a keda den e área. Lo konserva mas tantu palu di mangel ku ta posibel, i lo planta esakinan di bek kaminda ta posibel.
