AQUALECTRA TA SPLIKA FALTA DI KAPASIDAT

AQUALECTRA TA SPLIKA FALTA DI KAPASIDAT

Willemstad 27 di Sèptèmber 2020 – Pa e próksimo sinku siman Aqualectra lo por tin falta di
kapasidat pa kumpli ku demanda ‘piek’ di koriente. Responsablemente Aqualectra ta splika kon
esaki por ta posibel, despues di tur e invershonnan hasí den e último añanan. Ku asistensia di e
kompanianan General Electric i Wärtsilä Kòrsou su kompania di utilidat ta trahando double shift
pa remediá e situashon.
Te fin di òktober Aqualectra lo informá komunidat tur djaluna, djárason i djabièrnè di e progreso
ku su profeshonalnan ta hasiendo pa oumentá e kapasidat di koriente i pa avisá pa eventual
‘schakelmentu’ (alterná kitamentu di koriente pa algun ora den barionan), ounke ta purba pa
evitá esei.
Kapasidat total
Despues di a para produkshon ku turbina di stom na Mundu Nobo na 2014, Aqualectra a invertí
den e planta di Dokweg IIA ku ta produsí 36 Megawatt (MW) di koriente i a inougurá e planta di
Dokweg IIB ku kapasidat di 39 MW pa un total di 75 MW remplasando e planta na Mundu Nobo.
Tambe a inougurá e di dos parke di mulina di bientu na Tera Kora na 2017, subiendo e kapasidat
total di energia renovabel te ku 46 MW. Esaki ta nifiká ku Kòrsou por disponé di 162 MW di
koriente produsí konvenshonalmente i ademas 46 MW di koriente produsí ku bientu.
Riba un dia normal Kòrsou ta usa di 100 pa 120 MW di koriente kontinuamente. Den temporada
di kalor e demanda sa subi te 130 MW na sierto momento di dia. E aña aki e demanda máksimo
a yega di alkansá 135 MW.
E sifranan akí ta sugirí ku no por tin falta di koriente, pasobra 162 MW produsí
konvenshonalmente huntu ku 46 MW produsí ku bientu (ora tin sufisiente bientu) ta mas ku 135
MW di demanda. E reto i problema ta ku temporalmente Aqualectra su produkshon no ta yega e
kapasidat total. E realidat lamentabel ei ta debí na kuater faktor.
E promé faktor ta ku no tin masha bientu ta supla e dianan akí. Esei ta pone ku no por konta ku e
46 MW produsí di forma alternativo. Ironia di bida ta, ku ta e mesun falta di bientu ku ta posibilitá
produkshon di koriente ku bientu, ta kousa subida di demanda pa koriente dor ku ta hasi mas
kalor.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: