Kontrol riba establesimentunan.

KOMUNIKADO DI PRENSA 413 / 2020
17 òktober 2020
Kontrol riba establesimentunan.
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ
Djabièrnè 16 di òktober 2020, personal di Kuerpo Polisial huntu ku esun di M.E.O. a
kontinuá ku nan kontrolnan na diferente sitio riba nos isla.
E kontrolnan aki tabata dirigí spesialmente riba aglomerashon di públiko, mantenshon di
distansia físiko, aplikashon di reglanan di higiena i eventualmente otro iregularidatnan den i
rondó di e establesimentunan aki.
A kontrolá den área di Caracasbaai(weg), Bapor Kibrá, Penstraat, Pietermaai, Montana,
Roosevetlweg i Winston Churchillweg.
Na Mambo Beach a sera seis (6) establesimentu pa motibu di aglomerashon i a atendé
tambe ku bishitantenan ku tabata riba e playa den kuadro di distansiamentu sosial.
Den Pietermaai tambe a sera un establesimentu debí ku tabatin mas tantu hende ku ta
permití.
E tim ku ta enkargá ku e kontrolnan aki, a tuma nota di videonan i potrètnan ku tabata
sirkulá riba retnan sosial, ku lamentablemente ta laga krea e impreshon, ku ta kontrolá
únikamente den sierto área i ta atendé solamente ku un grupo spesífiko i otronan ta keda
eksonerá di e kontrolnan aki.
Kuerpo Polisial ke pone bon kla, ku e tim aki ta kontrolá rònt Kòrsou i ta atendé ku tur
sitio i tur establesimentu, sin importá ken ta e propietario òf ta kua grupo di enfoke ta
bishita e establesimentu aki.
Den pasado ya kaba esei tabata e kaso, ku den área di Janthiel a sera un negoshi.
Naturalmente ta ku un kapasidat limitá di personal e trabou ta wòrdu hasi i p’esei ta hasi
esaki pa medio di un planifikashon adelantá.
Sinembargo e tim aki ta keda fleksibel, pa na momentu ku e haña informashon di
iregularidat na un sitio ku e dia ei kisas no tabata na turno pa wòrdu bishitá, e verifiká
esei i pone e establesimentu aki mesora riba lista pa wòrdu atendé e momentu ei.
Di tur manera e tim konsistí di Kuerpo Polisial i M.E.O. lo sigui ku nan kontrolnan riba tur
establesimentu sin eksepshon, pasobra e meta komun ta, di evitá ku e kantidat di
infekshon ta sigui subi i sigui plama den nos komunidat, ku tur e konsekuensia ku esei por
tin pa nos komunidat den su totalidat.
Finalmente Kuerpo Polisial ke keda kòrda kada siudadano riba nan propio responsabilidat
ku nan tin di kuida nan mes i nan famia.
Bo por skapa bo mes i otronan dor di yama e number 917 òf app nos na 5242480, na
momentu ku bo tuma nota di aglomerashon òf inkumplimentu ku distansia físiko