Desishon a kai ku ta sera Giro

Promé ku aña kaba Girobank lo sera su portanan. Tur trahadó lo pèrdè nan trabou. Tin chèns ku algun di e trahadónan lo por bai traha pa un kompania nobo ku ta bai tuma e portofolio di Giro. E portofolio ta enserá tur kliente, tur plaka i tur fiansa ku mester kobra klientenan ainda. E kompania nobo lo no ta un banko.

Esaki ta loke fuentenan na CBCS a konfirmá. Último dianan direktornan di Giro a reuní ku tur e mènedjernan pa kuminsá informá nan loke ta bai pasa otro luna. Entretantu tin diferente empleado di CBCS trahando na Giro Skalo i Janwe pa prepará e seramentu di e filialnan.

Ku e plaka ku Hulanda ta bai fia Kòrsou, lo paga gran parti di e klientenan ku nan sèn ta blòkiá na Giro. E klientenan ku tin hopi sèn lo haña un parti i e sobrá ta kedá wantá temporalmente. E klientenan akí sigur lo pasa pa e kompania nobo pa nan por haña tur nan sèn ora esaki ta disponibel. E kompania su tarea prinsipal lo ta pa kobra tur fiansa pa por paga klientenan grandi di Giro.

Trahadónan di Giro lo haña nan sesantia, e fuentenan a konfirmá.