PIN ke mira un Kòrsou Dotá 

 

 PIN ke mira un Kòrsou Dotá 

 

Partido Inovashon Nashonal (PIN) a bai den baul di nos dushi lenga Papiamentu i haña e palabra ku ta kubri e partido su vishon pa futuro di Kòrsou: “Un Kòrsou Dotá”. Ku e slogan aki PIN ta ekspresá su deseo pa Kòrsou i akshonnan ku e partido lo bai entamá na bienestar di tur hende. Dotá ta nifiká bendishoná, kargá òf yená ku talento, konosementu, salú, solidaridat, kompashon, hendenan determiná,  emansipá i liber i un monton di otro kosnan ku PIN i su lider polítiko Suzy Camelia-Römer ke mira realisá.

 

PIN for di su inisio na 2017 ta propagá kambionan fundamental den nos sistema di edukashon i enseñansa, prevenshon i un ekonomia sirkular i regenerativo kaminda naturalesa i medio ambiente ta haña nan luga den desaroyo di nos pais. E partido ku’n trayekto kòrtiku, ya a demostra di no ta sukumbí pa retonan grandi, manera esei tabata e kaso di finalisashon di konstrukshon di hospital nobo, promové produkshon di nos mes kuminda pa medio di agrikultura i atendé ku krisis manera esun di Covid-19. Hopi awe ta lamentá ku e ola di kontagio di Covid-19 no por konta ku e determinashon di sra. Camelia-Römer ku tabata minister di salú na momentu ku e pandemia a yega Kòrsou.

 

Partido PIN tambe durante  último tempu ta sigui para fuerte pa salbaguardiá e outonomia ku nos ansestronan a bringa asina tantu p’e i a mustra rechaso pa e manera ku Hulanda ta malusá e krisis mundial di Covid 19  pa kita for di nos derecho pa goberná nos mes asuntunan, esta nos outonomia. Ta netamente eynan PIN ta mira den e monton di talentonan ku tin riba nos isla, oportunidat pa nos ta solidario ku otro i atendé di un manera inovativo ku solushonnan pa nos retonan.

 

Pronto PIN lo elaborá mas riba su vishon ku ta basá riba kontenido konkreto pa tur hende na Kòrsou por bai dilanti. Pa esaki PIN lo habri e kanalnan pa pueblo por drenta den diálogo ku PINistanan riba futuro di Kòrsou.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: