Registrá den e portal nobo goAML di Financial Intelligence Unit Curaçao entrante 1 yanüari 2021

 

Registrá den e portal nobo goAML di Financial Intelligence Unit Curaçao entrante 1 yanüari 2021

Geplaatst op 18 November 2020 dor di Ministerio Finansa

Manera a informá den e komunikado di prensa anterior, Financial Intelligence Unit Curaçao (FIU), anteriormente MOT, ta den transishon pa yega na un portal nobo pa mèldu transakshon no usual kuminsando dia 1 di yanüari 2021. Tin un plan di 5 paso ku lo sòru pa un transishon suave pa, tur persona i organisashon ku ta mèldu, por kuminsá mèldu den e portal nobo goAML. E portal akí lo remplasá e portal bieu Corsys. FIU Curaçao lo emití regularmente anunsionan durante e kaminda pa yega na e fecha ku lo introdusí e portal nobo.

Paso 1, ta enserá tèstmentu di e sistema ku un grupo selektá di instansia ku ta mèldu. Paso 2, ta trata di treinen riba kon por registrá den e portal nobo di goAML. Tur entidat ku ta mèldu mester (bolbe) registrá den e último kuartal di 2020 den e portal nobo goAML pa por mèldu transakshonnan no usual kuminsando dia 1 di yanüari 2021. E proseso aki ta diferente for di ántes. Hasta si bo a registrá bo mes kaba den Corsys, tòg bo mester bolbe registrá di nobo den goAML.

For di 16 di novèmber 2020 te ku 20 di novèmber 2020 FIU Curaçao lo tin seshonnan kòrtiku di instrukshon di un forma virtual. Den e seshonnan lo instruí tur entidat ku ta mèldu riba kua forma nan lo mester registrá den e portal nobo pa mèldu goAML. Tur reunion di instrukshon lo tuma lugá via Webex. Por asistí na e reunion solamente si bo haña un invitashon di FIU Curaçao. Si un entidat ku mester mèldu no a risibí un invitashon e mester tuma kontakto ku FIU Curaçao via goaml@fiucuracao.cw.

Dia 23 di novèmber 2020 lo kuminsá ku Paso 3: Entidatnan ku mester mèldu por kuminsá registrá (di nobo) den e portal pa mèldu goAML.

FIU Curaçao a introdusí un e-mail adrès speshal pa e entidatnan ku mester mèldu por usa pa preguntanan spesífiko i otro petishon pa informashon tokante e proyekto di goAML: goaml@fiucuracao.cw.

Pa pregunta general tokante mèldumentu na FIU Curaçao, tuma bon nota di e informashon tokante esaki riba nos wèpsait (www.fiucuracao.cw, bou di “REPORT”) òf tuma kontakto ku nos via analysis@fiucuracao.cw, òf via telefon: 462-6588.