MFK ta proponé: Kanselashon di reunion públiko pa trata lei di Estado di Eksepshon, pa habri espasio pa eksperto den lei duna konseho.

 

Willemstad, 29 di novèmber 2020

 

Na:  Presidente di Parlamento,

        Señora A. Pauletta

        Wilhelminaplein 4

        PRESENTE

 

Tópiko: MFK ta proponé: Kanselashon di reunion públiko pa trata lei di Estado di Eksepshon, pa habri espasio pa eksperto den lei duna konseho.

 

Señora Presidente,

 

Frakshon di MFK a tuma nota ku bo a saka un invitashon pa trata e projekto di lei di estado eksepshon djamars 1 di desèmber den un reunion públiko di Parlamento.

 

Nos tur por a tuma nota e kantidat di resistensia i protesta ku tin kontra di e lei aki. Nos a mira un Nota di Kambio ku Minister a manda Parlamento riba e Lei di Estado di Eksepshon aki. E nota di kambio aki ta un kambio substansial i konsekuentemente e projekto di lei aki mester bai bek Raad van Advies. Pero e nota di kambio aki no ta kubri tur e artíkulonan i kambionan ku mester trese den e Lei aki, pa asina pueblo di Kòrsou por sinti nan mes konfortabel ku e Lei. 

 

Mirando ku Parlamento tin e tarea di kontrolá gobiernu i salbaguardiá nos demokrasia, frakshon di MFK ta kere ku ta na su lugá pa e proyekto di lei aki no wòrdu trata den un reunion públiko ainda.

 

Komo representantenan di pueblo ta na su lugá pa nos manda e projekto di lei aki bèk pa Raad van Advies pa tuma nota di nan konseho i tambe pa Parlamento tende opinion i konseho di ekspertonan den un reunion di komishon sentral. Nos pensamentu ta bai riba un eminensia manera Profèsor Arjen van Rijn.

 

Ta bon pa nos no lubidá ku nos tur a wòrdu skohe den e kolegio aki pa ta representashon di pueblo di Kòrsou i no di gabinete Rhuggenaath. P’esei ta korekto pa nos mustra pueblo di Kòrsou ku nos ta tene debido kuenta ku su preokupashon i deseonan i ku nos ta skucha ekspertonan, promé ku e lei aki wòrdu trata den un reunion públiko.

 

Teniendo kuenta ku e puntonan ariba menshoná, frakshon di MFK kier proponé konkretamente pa kanselá e reunion públiko di mayan i manda e projekto di lei bèk 

 

ku e nota di kambionan pa Raad van Advies i despues konvoká un reunion di komishon sentral kaminda Parlamento por skucha opinion di mas eksperto.

 

Atentamente,

 

_________________

Charles Cooper

Lider di frakshon

suplente di MFK