PIN ta pidi: kap e palu, ma no rosa e mondi!

PIN ta pidi: kap e palu, ma no rosa e mondi!

E gloria deportivo di Bándabou i Centro Barber no meresé un mancha asina ki.
Willemstad — Pa e mal hasí di algun polítiko i algun dirigente, awe Bándabou i espesialmente e
grandinan ku tabata na kuna dje éksitonan sosial i deportivo di Centro Barber, konstantemente
mester tende nòmber di nan klup komo si fuera ku ta trata di un organisashon kriminal. Partido
PIN ta keda pará na banda dje boluntario humilde di bario ku a pone i ta teniendo Centro Barber
riba pia. Sinembargo, miéntras ku PIN ta enkurashánan pa sigui, den mes rosea nos ta pidi esnan
responsabel pa nan duna kara i mas klaridat pa Barber sigui haña e rèspèt ku e meresé.
Nesesidat
Sin sufisiente kontrol a otorgá e klup sosial i deportivo di Barber un suma ku e meta pa kubri nan tereno
ku yerba artifisial. Klaramente a mira hustifikashon pa esei den e éksitonan deportivo dje ekipo i tambe
den e realidat ku nivel dje fasilidatnan deportivo di Bándabou ta kana atras. Pa mandatarionan enkargá
ku deporte tambe lo mester tabata bon kla ku, sin un yudansa eksterno, e orguyoso region di Barber lo no
yega na e superfisie di yerba tan nesesario. Pesei pa PIN e prioridat ta pa hisa e nivel di infrastruktura
deportivo na Barber i su bisindario di moda ku e talento deportivo ku e hubentut di Bándabou ta dotá
kune por sali mas dilanti.
Maniobranan straño di dirigentenan polítiko of deportivo no mag stroba e nesesidat aki. Pesei PIN ta pidi
pa stòp di menshoná Centro Barber den un forma ku ta pone lus negativo riba e esfuersonan honesto i
humilde dje ekipo i su boluntarionan. Konkretamente: den e kaso di e 272 mil florin ku no por
responsabilisá, ta mihó papia spesífikamente di ‘esnan ku ta of tabata responsabel’. Asina ta kuida e
reputashon di un kantidat di boluntario. Asina tambe por atende ku tur loke mester atende kune sin tacha
e honor deportivo di un dje ekiponan mas bieu di Bándabou.
Sigientemente
Lógikamente Parlamento, na kual Kontraloria General ta raporta, mester atende e rapòrt i ekspresá su
opinion kla riba kiko mester pasa tokante e sumanan sin aklarashon. PIN di su banda ta pidi Parlamento i
e minister konserní pa wak mas leu. Wak pa rekuperá loke por rekuperá, pero wak tambe kon por duna
sosten èkstra na organisashonnan sosial-deportivo ku ta nifiká hopi pa un region ménos priviligia di nos
pais.
Segun PIN, klupnan deportivo i sosial di Bándabou ta kai den e kategoria ei. Pesei PIN ta konta ku
minister, Parlamento i e organisashonnan mes lo ta habrí pa diskutí den ki forma por hinka e sosten ei.