A inisiá seshonnan di informashon interaktivo riba e trayekto di bakunashon COVID-19.

 

A inisiá seshonnan di informashon interaktivo riba e trayekto di bakunashon COVID-19.

Geplaatst op 09 January 2021 dor di Ministerio Asuntunan General i Promé Minister

Willemstad – Pa mundu kompletu, aña 2020 tabata un aña kaminda, pa medio di diferente esfuerso, lider i ekspertonan a hinka tur ku tin pa batayá e pandemia di COVID-19. Den aña 2021 ta bai inisiá un trayekto di algun aña pa enfoká riba informashon, konsientisashon i implementashon di e bakunashon, di moda ku mundialmente nos por logra tene e vírùs di Corona mas tantu posibel bou di kontrol.

Den tur esaki, Kòrsou no tabata un eksepshon. Nos pais a konosé hopi reto pa motibu di e pandemia aki i Kòrsou durante 2021 tambe ta bai re-establesé su mes poulatinamente.

Netamente pa por logra esaki,  Gobièrnu a instituí un grupo di trabou spesialmente dediká na e programa di bakunashon COVID-19 na Kòrsou. E grupo di trabou aki, ta konsistí di ekspertisio i konosementu di profeshonalnan lokal ku por yuda sostené i kanalisá e proseso di tantu distribushon di informashon komo tambe e proseso di implementashon di e bakuna aki na su debido tempu.

Riba djabièrnè 8 di yanüari i djasabra 9 di yanüari, e departamento di komunikashon komo parti di e grupo di trabou, a duna inisio na e trayekto aki pa medio di seshonnan di interakshon ku tres (3) diferente grupo di enfoke. Ta trata aki di gruponan di enfoke den e aparato gubernamental, sektor médiko, sektor sosio-ekonómiko i miembronan di prensa lokal. Meta di e seshonnan aki tabata primordialmente, pa di un forma interaktivo i inklusivo dialogá ku siudadanonan for di diferente grupo den nos komunidat pa huntu logra inventarisá puntonan di atenshon ku ta di importansia pa tene na kuenta durante e trayekto di bakunashon aki na Kòrsou. Informashon ku keda kompilá for di e diferente seshonnan aki, lo sirbi komo informashon pa e grupo di trabou den implementashon i komunikashon nashonal pa bakunashon COVID-19 na Kòrsou.

Djamars awor, dia 12 di yanüari, Gobièrnu di Kòrsou ta tene un Konferensia di Prensa den kua komunidat tambe por kuminsá haña mas bista a fondo den e trayekto di bakunashon COVID-19 na Kòrsou. Esaki ta djis e inisio. Mientras nos ta enkaminá e proseso aki, Gobièrnu di Kòrsou huntu ku e grupo di trabou ta komprometé pa sigui informá regularmente, ku informashon konfiabel i e transparensia nesesario di manera ku tur gremio den nos komunidat por disponé di tur informashon tokante e trayekto di bakunashon COVID-19 na Kòrsou.

 

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: