Edishon nobo di revista ‘REACH’ ta riba merkado

Edishon nobo di revista ‘REACH’ ta riba merkado

Geplaatst op 15 January 2021 dor di Ministerio Desaroyo Ekonómiko

Willemstad- Promé edishon di revista digital REACH di 2021, a kaba di sali. ‘REACH’ ta un publikashon di Ministerio di Desaroyo Ekonómiko (MEO) ku ta duna informashon riba diferente tema ku tin di aber ku ekonomia di Kòrsou.

E promé edishon di ‘REACH’ pa 2021 ta dediká na implementashon di e plan di rekuperashon ekonómiko, liderá pa Minister Dr. I. Steven Martina. Ademas di ilustrá e efektonan di COVID-19 riba nos ekonomia, Minister Martina ta elaborá tambe riba diferente solushon i aspektonan importante di su maneho ekonómiko ku a keda introdusí. Sin mas, ta pone atenshon spesial tambe na e diferente proyektonan ekonómiko nobo ku ta na kaminda.

Den e edishon akí di ‘REACH’, por lesa tambe tokante e inisiativa di MEO pa buska mas konekshon ekonómiko ku e Diaspora di yunan di Kòrsou ku ta biba rònt mundu. Durante e kumbre digital ‘YDK Diaspora’ ku MEO a tene na luna desèmber 2020, e partisipantenan a presentá hopi idea ku nos lo por sigui desaroyá pa asina yega na hasi mihó uso di e posishon úniko ku Kòrsou tin pa loke ta trata e kantidat grandi di yunan di Kòrsou ku ta bibando den eksterior. Hopi di nan ta ehersé posishonnan importante ku por yuda ku desaroyo di nos isla.

Aparte di esaki, ‘REACH’ ta pone un lus tambe riba diferente otro inisiativa ekonómiko ku ta tumando lugá riba nos merkado, sigur pa loke ta trata desaroyo di komèrsio internashonal.

Tur persona interesá, por risibí un kopia digital di revista ‘REACH’ kompletamente grátis. Buska bo ehemplar via www.reach-curacao.com i ‘download’ e pa bo informá bo mes!

This site uses Akismet to reduce spam. Learn how your comment data is processed.

error: Content is protected !!
%d bloggers like this: