Minister Croes enkantá ku historia i habitantenan di Boca Sami. Willemstad 29 yanüari 2021- Minister di Enseñansa Siensia Kultura i Deporte (ESKD) Minister Steven Croes djadumingu 24 di yanüari último a bishitá e bario Boca Sami.

Minister Croes enkantá ku historia i habitantenan di Boca Sami.

Willemstad 29 yanüari 2021- Minister di Enseñansa Siensia Kultura i Deporte (ESKD) Minister Steven Croes djadumingu 24 di yanüari último a bishitá e bario Boca Sami.

 

Den un ambiente masha ameno na kas di Fito Martina, Minister Steven Croes a kombersá ku un kantidat di 15 habitante tokante historia i desaroyo di e bario Boca Sami. Komiendo kai kai di mulá ku pan di furnu, kuminda típiko di Boca, Minister Croes a skucha kon e habitantenan ta konta ku un orguyo profundo tokante nan bario. Hopi habitante di e bario ta karga e fam Zimmerman i ta desendiente di Christiaan Zimmerman, ku a nase na 1799 di un tata Hulandes i mama Curasoleño. Christiaan Zimmerman ta derá na Boca i te awe e habitantenan ta kuida e graf, por sierto un sitio ku kualke bishitante na Boca mester pasa wak. E tabata e delaster ‘fortwachter’ ku Hulandesnan a pone na e forti konstruí pa defendé e área. Sr. Marlon Regales a konta ku Boca tabata masha importante den tempu di gera i ku tabatin basta militar ta biba einan. Segun nan, ta e energía di e militarnan aki a pone ku Boca a desaroyá tantu deportista, piskadó i hendenan ku hopi energia, ku no sa drumi mashá i ku tin hopi forsa. Sra. Mele Regales, ku pa 45 aña a duna lès na skol, a konta kon ela bai Hulanda den su promé fakansi pa wak lokual e bukinan di skol tabata skirbi tokante Hulanda i ela konta e muchanan di Boca tur lokual ela mira i eksperensiá, lokual a yuda e muchanan masha hopi. Esaki sigur ta muestra di un maestro di skol ku hopi amor i dedikashon pa su alumnonan. Semper e tabata boga tambe pa e muchanan di Boca sali for di e bario un ratu pa amplia nan eksperensia i konosementu. Muchanan di Boca ta mashá sabí mes pero nan no ta haña un chèns. Antes mayornan hopi bia tabata tene nan yu na kas, lokual tambe ta un di e motibunan ku hopi mucha no tabata sigui studia. Boca antes tabata bastante será, pero nan a biba dushi. Sra. Regales a traha tambe na Jandoret i último tempu ela duna lès na Pro Alfa. Sr. Ibi Zimmerman a konta di e bario Sami Liber, un bario ku no por a planta pasobra e tereno tabata muchu salu. Sr Tony Zimmerman tambe a bai skol na Boca. Ela a traha varios aña den maneho di enseñansa. Segun su opinion, awendia ta profundisá muchu tiki den maneho di enseñansa i diskriminashon den enseñansa ta un problema ketubai. E grupo a elogiá mama di Minister Zita Jesus-Leito, ku tabata un di e mihó maestronan di skol na Boca. Tanchi Lika a konta kon mama di Minister Zita a enkurashé pa partisipá pa Mama Maskedera. Komo parti di e mainta nan a duna Minister Croes un demostrashon kon un maskadera ta mara lensu i a konta ku antes si bo debe un maskadera di Boca bo ta den problema grandi. 

Un deseo hopi grandi di habitantenan di Boca ta pa hasi un estudio tokante Boca. Segun nan Boca tin un historia úniko i e habitantenan ta otro for di tur otro bario na Kòrsou. E bario ta eksistí pa mas ku 300 aña. Minister Croes ta wak bèk riba un mainta masha plasentero, ku hopi harimentu kordando historianan di antes. Minister Croes ta sumamente agredisí pa e forma ku e habitantenan di Boca a habri man risibi’é. Sigur sigur lo e bolbe Boca pa sigui kombersá.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: