Gobièrnu ta firma un akuerdo mas na benefisio di desaroyo deportivo na Kòrsou

Gobièrnu ta firma un akuerdo mas na benefisio di desaroyo deportivo na Kòrsou

Geplaatst op 18 February 2021 dor di Ministerio Enseñansa, Siensia, Kultura & Deporte

WILLEMSTAD – Gobièrnu di Kòrsou ta traha riba desaroyo deportivo konforme e programa di gobernashon. Ministernan sr. Steven Croes i sra. Zita Jesus-Leito den representashon di Gabinete Rhuggenaath ta firma un akuerdo mas pa desaroyo di deporte. Gobièrnu pa medio di Ministerio di Enseñansa, Siensia, Kultura & Deporte i Ministerio di Tráfiko, Transporte & Planifikashon Urbano, a start ku un trayekto pa yega na un maneho nobo for di aña pasá. Konforme e maneho, ta firma akuerdo ku organisashonnan ku ta bin na remarke pa hasi esaki segun un lista di kriterio pa desaroyo di nos fasilidatnan deportivo i vèltnan.

E trayekto akí a kuminsá na sèptèmber 2020 den estrecho koperashon ku Fundashon Desaroyo Deportivo Kòrsou (FDDK) kaminda Gobièrnu a firma ku vários organisashon den forma di ‘Drive-Thru’ na Sentro Deportivo Kòrsou.

Siman pasá a firma un akuerdo ku Union Deportivo Koraalspecht huntu ku nos pelotero Ozhaino (Ozzie) Albies pa desaroyo di dos vèlt den e bario di Koraalspecht. Esaki den presensia di deportista coach Theofilo (Chofi) Veld i muchanan di e bario huntu ku FDDK.

Awe a toka turno pa firma un akuerdo pa desaroyo di vèlt na tereno di DABA (Dutch Antilles Ballpark Academy) pabou di Sabana Ballpark/hanchi dilanti di Richard ‘Chati’ Constansia banda di Richard Elhage. Ministernan sr. Steven Croes i sra. Zita Jesus-Leito a firma ku astro pelotero sr. Hensley Meulens ku ta representá DABA Foundashon. E akuerdo ku Bambam Meulens tin un durashon di 5 aña ku e posibilidat pa alargá esaki. A base di e akuerdo aki DABA ta bai desaroyá un proyekto fantástiko pa nos hòbennan. E ta enserá formashon di hòbennan den e deporte di baseball, stimulá desaroyo di baseball den e parti di Reinu den Karibe, organisá aktividatnan di baseball manera clinics, seminario pa coach i training. Tambe e fundashon ta bai sòru pa diferente material nobo pa nos hòbennan por praktiká baseball di un manera optimal.

Por mira bèk riba un trayekto eksitoso i ku ta brinda perspektiva na e desaroyo deportivo. Gobièrnu a firma ku un total di 13 organisashon den e último temporada akí pa asina desaroyo di deporte por tuma lugá i brinda e perspektiva deportivo na nos hóbennan.

**Riba e fotonan athunto por tuma nota di e momentunan kaminda e ministernan Croes i Jesus-Leito a firma ku Hensley (Bambam) Meulens i Ozhaino (Ozzie) Albies.

 

Ministerio konserní 

This site uses Akismet to reduce spam. Learn how your comment data is processed.

error: Content is protected !!
%d bloggers like this: