Aliansa kontra violensha doméstiko i abusu di mucha ta duna rekonosementu na tur hende muhé di Kòrsou, di regio i di mundu

 

Aliansa kontra violensha doméstiko i abusu di mucha ta duna rekonosementu na tur hende muhé di Kòrsou, di regio i di mundu

Selebrashon di dia internashonal di hende muhé ta un dia dediká na honra loke hende muhé den historia i awe a logra tur kaminda na mundu. E ta  na mes momentu un ratu pa para ketu na kiko ta e kosnan ku mester hasi ainda pa por logra paridat entre hende muhé i hende hòmber. Tur aña Nashonnan Uni ta krea un tema pa e festividatnan i aktividatnan ku hende muhé ta organisá rònt mundu. E aña aki e tema ta: Hende Muhé i Liderazgo: kreashon di  un futuro den un mundu di COVID-19. E tema ta indiká pa nos selebrá tur e esfuersonan ku hende muhé rònt mundu a hasi pa krea un futuro mas igual  durante di e pandemia di Covid-19. Importante ta pa mesora mustra tambe riba e bareranan ku mester keda eliminá . 

Aliansa kontra di Violensha Doméstiko i abusu di mucha ke yama tur hende muhé, mucha muhé, mamanan, welanan pabien ku nan dia. Atenshon ta bai tambe na tur muhé ku te ainda nos ta ekskluí sea pasó e ta pober, tin un desabilidat, o sea pasó e ta ekskluí pa motibu religioso òf pasó e ta persona no dokumentá, òf pasó el a skohe pa stima un hende di su mes género. Tambe nos ke pone atenshon na e   hende muhé ku ta den prizòn pa un of otro delito. Nos ta spera ku kada un di boso por sali pronto, ku un plan i propósito pa hasi e reformanan nesesario pa boso i boso yunan por hiba un bida hustu di hopi amor i energia positivo.  

Den e periodo di e delaster 5 aña nos a weta diferente progreso serka hende muhé, manera e hecho ku hende muhé hóben a bira mas mòndu kompará ku  un periodo anterior. Nos a weta ku mas hende muhé a subi tarima polítiko i ta vosiferá nan opinion. E kandidat di hende muhé ku tin nan mes empresa a krese. Mas skol a disidí ku nan alumnonan, tantu mucha muhé komo mucha hòmber, lo haña edukashon seksual integral. E kandidat di hende muhé ku ta duna yudansa boluntario na nan komunidat a oumentá. Tur esaki ta kosnan di aploudí.

Sinembargo nos a weta tambe retraso i stagnashon den desaroyo  di hende muhé i mucha  muhé hóben i di pueblo en general. E pandemia a hasi e desigualdat  mas bisto. E pobresa i e pèrdèmentu di trabou ta dal semper e hende  muhé mas duru, en partikular e mama soltero. Hopi di nos mamanan ku ta traha riba  tereno di turismo a pèrdè trabou, tambe e mamanan ku ta traha den e sektor informal ku por a lora man ku nan kapsalon, drechamentu di uña etc. Programanan pa mama hóben a haña ménos sèn i ta falta e sosten soshal pa nan por bai dilanti. E kasonan di violashon seksual di hende muhé ta keda un menasa ku ta eksigí mas konsientisashon di tantu mucha hóben i mayor. Muhénan ku a bira víktima di violensha doméstiko ta falta e yudansa pa nan por bira independiente i para riba nan pia. Hopi biaha nan ta karesé di e posibilidat di ònderstant, e posibilidat di bibienda, mas posibilidat di yudansa legal, inkluso haña e dokumento di prohibishon di kontakto di e agresor. Ta importante pa krea mas posibilidat di orario di trabou ku ta flèksibel pa asina krea mas posibilidat di edukashon di e yunan na kas.Un di e problemanan mas grandi ta keda ku nos mester dil ku un enseñansa ku ta defisiente den tur sentido, inkluso e enseñanza di fishi.

 Awe den 22 pais ta hende muhé ta na kabes di nan gobièrnu  I un mayoria  a hasi un tremendo trabou durante di e pandemia. Nos mester siña di e bon ehèmpelnan. Ta keda ku te ainda hende muhé no ta sufisiente representá den gobièrnu, tampoko den parlamento. Kada un di nos komo hende muhé por ta un líder pa krea kambionan positivo den nos sosiedat. Esaki ta rekerí: liderazgo di kurashi pa nos por enfrentá e retonan nos dilanti; un liderazgo  di un vishon i mishon kompartí ; un konosementu di pueblo basá riba un práktika di yudansa na pueblo; un plan stratégiko kompartí. Nos lidernan hende muhé mester ta kreyente den un demokrasia bibu i transparente i mester ta praktiká esaki den nan bida diario. E líder hende muhé mester ta un persona íntegro. 

Nos ta deseá tur hende muhé ku ta aspirá di tin un ròl pa yuda i transformá nos pais den un sosiedat pa nos tur, hopi sabiduria i energia positivo.  

1. Henriquez

Presidente Aliansa