Spich Konferensia di Prensa ADEFA – 8 di mart 2021 / DISKURSO ELSA ROZENDAL LIDER PARTIDO DEMOCRAAT | ACCION DEMOCRATA FEMENINA

 

Dia internashonal di hende muhé

 

Awe dia internashonal di hende muhé, nos ke selebrá e progreso ku hende muhé a hasi for di 1948. E aña ei nos hende muhernan a haña  derecho pa vota. 

73 aña pasa nos hende muhernan a  sa di usa nan vòs kolektivamente pa entamá un proseso di emansipashon  awe nos por tin  un Kòrsou ku mas igualdat di género.

 

Pues ta importante  pa awe nos selebrá e esfuerso  di ADEFA (Akshon demokrátiko femenino).

ADEFA  un kompromiso pa  selebrá e logro di nos derechonan  komo muher nan y e ambishon i kompromiso tambe di ta un sosten pa e desaroyo di e famianan di Kòrsou.

 

Aktualmente a toka ami Nathaly……..  e honor ta presidente di fundashon ADEFA 

 

 ADEFA su mishon  ta pa traha pa e adelanto i desaroyo sosial i kultural di nos hende muhé nan i  fortalesé I apoyá famia nan di Kòrsou. Asina krea  lasonan fuerte di union familiar  ku ta forma  base pa  komunidat  felis I un sosiedat ku mayor bienestar. Pa esei ta afiliá na partido Democraat ku ta e partido ku  Semper a komprometé pa traha na  igualdat i hustisia sosial. I ta buska union di nos pueblo . 

 

ADEFA su orientashon i enfoke, ta den prevenshon, empoderashon  di hende muhé I inklushon di kada miembro di famia.

 

Aunke nos a logra adelantonan grandi,  ainda nos tin hopi kaminda pa kana pa sigui logra un mihó komunidat di igualdat i sin deskriminashon. 

 

Nos aporte  ta pa nos muhernan ta responsabel i konsiente di nan derechi i debernan komo hende i bon suidadano. 

No por tin duda  di nos igualdat ku nos hende hòmber nan pa asina huntu komo partnernan igual  nos traha i  elevá nos komunidat.

Emansipashon di hende muhé no ta un kompetensia ku hende hòmber. Pero un proseso pa posishoná nos mes igual i traha huntu den tur aspekto. 

 

Pa esei, nos mester sigui  krea espasio pa e liderazgo di nos damanan,  pa realmente nos traha huntu na nos bienestar.

 

Ku esaki nos ke logra tambe  pa kaba ku tur klase di violensia di género. 

 

Konsiente di e igualdat di hende hòmber i hende muhé i akseptashon pa nos dama nan kontribuí  mas  den polítika, nos ta sigur ku e tarea nan ta bira mas fásil i desishonnan lo ta mas balansa. Asina nos lo yega na mayor benefisio pa tur.  Mayor felisidat, mayor bienestar.

 

 Echonan ta mustra ku ora hende, esta tantu  muhé meskos ku hende hòmber  haña akseso na un bon edukashon, na un bon trabou i otro benefisio nan e kresementu i stabilidat nashonal lo ta mihó.

Esaki lo sòru tambe pa ménos deskriminashon,  ménos adolesentenan na estado, ménos aborto, un mihó nutrishon infantil , mayor seguridat di alimentashon . Den poko palabra  “ paternalidat responsabel”

Al final un pueblo mas salu i mas felis. 

 

Pa esei ADEFA ta konsistí di hende hòmber i hende  muhé nan  ku ta kompartí e pensamentu aki  i  tin den ADEFA un aliado.

 

Nos tin e determinashon pa sigui ku e propósito di  ADEFA i pa e ta na e altura di e speransa i logro nan  di esnan ku den pasado a traha asina duru pa e fundashon. 

 

Nos tin e energia  pa uni nos hende nan , famia nan den nos  komunidat pa un mihó Kòrsou.

 

Nos ta komprometé pa salbaguardiá norma i balornan di nos pueblo ku awor ta dividí. I ku amor konosementu i determinashon yuda krea un mihó Kòrsou pa nos mes i nos  yu nan.    

 

Felis dia di hende muhé!.

 

Nataly Avila Garcia

 

Presidente ADEFA

---

DISKURSO ELSA ROZENDAL LIDER PARTIDO DEMOCRAAT | ACCION DEMOCRATA FEMENINA

– Saludo segun prokotòl –

Awe mi ta sumamente orguyoso di por forma parti di e renasementu di ADEFA, esta Acción Demócrata Femenina. Ta un previligio pa mi selebrá huntu ku tur presente, ku a bolbe hinka bida den ADEFA, un organisashon ku a hasi hopi pa pueblo di Kòrsou.

ADEFA a keda fundá pa e ala femenino di Partido Democraat, ku e meta di promové desaroyonan sosio-kultural i konsientisashon polítiko di e hende muhé Yu di Kòrsou. Ademas pa rekonosé igualdat di e hende muhé den sentido sosial i hurídiko.

Ta bon pa para ketu na e hecho, ku na momentu ku Partido Democraat a nase na 1944, ainda e hende muhé no tabatin derecho di voto, ni tampoko por a bisti karson. Awendia e muhé por vota ku su karson bistí. Pió ainda e muhé ámtenar mester a kita for di trabou, despues di sali na estado.

E moveshonnan femenino a forsa bara i awendia tin hopi muhé den polítika ku karson bistí, loke ántes tabata apsolutamente prohibí. E muhé, hopi biaha e palu di muhé tabata simpelmente un ama di kas, mama i no por a partisipá aktivamente den nada polítiko.

Partido Democraat di tur manera ta para pa igualdat den komunidat, meskos ku ADEFA a pensa basta aña pasá. Pará aki komo lider di Partido Democraat i hende muhé, ta hopi difisil pa mi imaginá mi mes, ku ántes e posishon aki lo a keda na un soño.

Mediante diferente ehersisio, ADEFA a yuda forma e famia grandi di Partido Democraat. E hende muhé a sirbi komo e yabi pa krese e tolda kòrá i habri espasio pa e krachinan por a goberná i hiba Kòrsou dilanti.

E muhé demokrat tabata konvensé tur hende pa vota Partido Democraat, pa garantisá adelanto di país i awe mi por bisa ku Partido Democraat ta sigui ku e transformashon, pa e un Kòrsou bon pa pueblo den tur sentido.

ADEFA tabata asina efisiente ku tin hasta muhé ku no tabatin relashon ku un hende riba lista di Partido Democraat, tabata bira miembro. Esaki ta prueba ku tabata i lo bolbe ta, un organisashon master hinká den otro.

Un detaye ku a konmové mi kurason, tabata e 100,000 florin ku ADEFA a yega di kolektá pa kumpra un aparato di bestraling di kanser, pa Prinses Wilhelminafonds. E hecho históriko aki, ta nifiká ku e konsientisashon sosial a funshoná perfektamente.

Ta un sekretu públiko, ku e muhé ku ta lucha tur dia di nobo i ta pasa trabou pa sobreviví den e tempunan difisil aki, tambe mester haña un sosten duradero, pa por hiba un bida digno huntu ku su famia. E muhé luchadó ku ta tantu mama komo tata, tambe meresé un yudansa kuerdo pa por disfrutá di bida. 

Awe riba Dia Internashonal di Hende Muhé, ku ta rebibá ADEFA mi ke probechá di e oportunidat aki, pa gradisí tur loke muhénan demokrat a hasi pa pueblo di Kòrsou.  

BIBA ADEFA, BIBA PARTIDO DEMOCRAAT!