Servisio di ònderstant den proseso di mehorashon

 

Servisio di ònderstant den proseso di mehorashon

Geplaatst op 18 March 2021 dor di Ministerio Desaroyo Sosial, Labor i Bienestar

Willemstad – Ministerio di SOAW pa algun tempu kaba ta trahando duru riba optimalisashon di e servisio ku e ta duna na su klientenan. Un di e retonan ku e Ministerio tabata konfrontá kontinuamente ta e tratamentu di petishonnan di ònderstant den un término kòrtiku.
Un di e ehersisionan ku e Ministerio a bin ta ehersé pa optimalisá su servisio ta digitalisá e proseso di un di e produktonan mas grandi di e Ministerio ku ta e produkto di ònderstant. E digitalisashon aki a trese un kambio positivo den e Ministerio dor ku e tratamentu di kada kaso por sosodé mas lihé i efektivo.

Dia 11 di desèmber 2020 a bira posibel pa hasi e petishon pa ònderstant online riba www.soaw.cw. For di dia e wèpsait aki a bai laif Ministerio di SOAW a risibí te ku medio di febrüari 2021 un kantidat di 474 petishon. Di e kantidat aki 211 (44.5%) tabata falta dokumentonan rekerí pa por sigui atendé e petishon i finalisá esaki. Un total di 45 petishon a keda aprobá (9.5%) i entretantu e klientenan aki a kuminsá risibí pago di nan ònderstant.
Un kantidat di 43 (9%) petishon a keda rechasá pasobra no ta kumpli ku lei di ònderstant. A keda un kantidat di 37 (8%) petishon ku ta den proseso di evaluashon ainda.
Notabel ta e kantidat grandi di petishon ku no ta kompleto pa ser evaluá (211).E ta menos si ku aña pasá desèmber ora 60% di e petishonnan, ku tabata den evaluashon, no tabata kompleto pa ser tratá. Ministerio di DSLB ta sigui hasi su esfuerso pa sigui duna informashon tokante e dokumentonan ku mester entregá ora hasi petishon pa ònderstant.

Ministerio di SOAW por konkluí ku despues ku e wèpsait a keda lansá na desèmber 2020, e proseso pa pidi ònderstant ta kanando hopi mas rápido i efektivo. Promedio tempu di espera promé ku e wèpsait a keda habrí tabata 16 siman i aktualmente nos ta konstatá ku esaki ta 8 siman i mei. Manera tresé dilanti kaba lei ta stipulá 8 siman. E meta ta pa e tempu di espera bira 4 siman.

Adishonal Ministerio SOAW a introdusí un maneho nobo ku ta enserá ku aprobashon di e kliente su petishon ta bai bèk te na e fecha ku e petishon a bira atmisibel. Esaki ta e momentu ku tur dokumento entregá ta kompleto i tur preguntanan ta kontestá pa e petishon por ser evaluá. Un petishon entregá por ehèmpel na desèmber 2020 i a keda deklará atmisibel na yanüari 2021 i for di e momento ei drenta e proseso di evaluashon i keda kla na mart 2021 ku e resultado ku e kliente por risibí ònderstant, e ta bai risibí esaki for di yanüari 2021.
Esaki sigur ta un mehorashon di e servisio ku e Ministerio ta brinda na su klientenan.

Klientenan ta hasiendo uso optimal di e wèpsait i di e fasilidat pa entregá nan dokumentunan rekerí via di e wèpsait mes ora di hasi e petishon online.
Pa por sigui redusí e tempu di espera pa evaluashon di un petishon di ònderstant aun mas ainda Ministerio di SOAW ta hasi un apelashon riba su klientenan, ku tin ku entregá e dokumentonan ku falta ainda, pa hasi esaki dentro di 2 siman (10 dia di trabou) despues ku a entregá nan petishon. Esaki ta e periodo menshoná den lei di ònderstant. Si no entregá e dokumentonan na tempu ta kanselá e petishon i mester hasi un petishon di nobo ora tur dokumentonan ta kompleto. Ku esfuerso mutuo ta sigui mehorá e proseso di atkerí ònderstant. Ministerio di SOAW ta pidi su klientenan pa yuda e Ministerio pa yuda su klientenan.
Ministerio di SOAW ta invitá tur persona pa wak e video di instrukshon ku ta aksesibel riba e ‘front page’ di www.soaw.cw ku hopi atenshon i tambe lesa e informashon ku ta riba e wèpsait pa asina risibí e informashon nesesario pa e entrega di e petishon pa ònderstant kana sin ningun inkumbiniensia.
Finalmente Ministerio di SOAW ta partisipá ku e ta hibando kòmbersashon ku Ofisina di Reclassering pa hasi posibel ku for di momentu ku un persona ku ta preso ku wòrdu kategorisá komo ‘min-en-onvermogende’ i ku konforme lei mirando su situashon ta bin na remarke pa ònderstant, lo risibí su karchi di MCB ku su promé kinsena ariba na momentu ku e bandoná sentro di detenshon i korekshon Kòrsou (SDKK). Awor ku por hasi aplikashon online esaki a bira un servisio adishonal ku Ministerio di SOAW ta brinda.