AQUALECTRA TA ADAPTÁ SU AKTIVIDATNAN PA SIGUI SIRBI KOMUNIDAT BASÁ RIBA MEDIDANAN DI GOBIÈRNU RELASHONÁ KU COVID-19

 

AQUALECTRA TA ADAPTÁ SU AKTIVIDATNAN PA SIGUI SIRBI KOMUNIDAT BASÁ RIBA MEDIDANAN DI GOBIÈRNU RELASHONÁ KU COVID-19

Willemstad 23 di Mart 2021 – Aqualectra a tuma nota ku Gobièrnu di Kòrsou a tuma vários medida ku ta afektá bida diario na Kòrsou. Esakinan tin efekto tambe riba e sistema di traha tur dia na Aqualectra. 

Na promé lugá Aqualectra su tarea prinsipal ta pa garantisá kontinuidat di suministrá di awa i koriente i e servisionan ku ta bai kompaña ku esaki. Na mes momento Aqualectra tin e deber di sòru pa tur e trabounan ku e hasi por sosodé den un kuadro seif i responsabel. Aqualectra ta adaptá su forma di traha pa por garantisá ku e ta kumplí ku su tareanan teniendo kuenta ku e konsekuensia di e medidanan ku gobièrnu a tuma relashoná ku e brote nobo di COVID-19 riba nos isla.

 

Produkshon, distribushon i mantenshon

Lo sòru pa produkshon di awa i koriente i tambe e proseso di distribushon di esaki sigui sosodé nòrmalmente. Pa por hasi esaki, lo keda hasi tur trabou den e plantanan di awa i koriente, pero tambe den e ret di awa i koriente nòrmalmente. Den e kuadro aki lo por tin mantenshon planiá, ku lo mester sigui normalmente pa por garantisá suministro. Esaki lo por kousa ku lo por tin interupshon planiá den áreanan. Manera kustumber lo publiká esaki den medionan di komunikashon lokal, nos wèpsait i Facebook.

 

Aqualectra lo sigui atendé ku kasonan di interupshon isolá (storing) òf lesamentu di meter di awa i koriente nòrmalmente. Den kaso ku pèrsonal di Aqualectra mester bini na bo kas pa por hasi un trabou, laga nos duna nan espasio pa nan por hasi nan trabou na e manera korekto i seif. Esaki spesialmente si mester drenta den kurá òf kas pa por yega a e instalashon di awa òf koriente pa por hasi e trabou. 

Un petishon ta bai na tur kliente, ku tin meternan ku ta den kas òf pegá na kurpa di kas, pa skibi e stant di e meter riba un papel i poné den brivenbùs.

Servisio na kliente solamente ku sita 

Nos servisio na kliente lo sigui funshoná nòrmalmente i segun sita. Nos ta urgi tur kliente ku mester atendé kualkier parti atministrativo sea subi Aqualectra.com i traha bo sita fásil òf yama nos number grátis 0800-0135. Nos agentenan lo informá bo kon ta e mihó manera pa atendé bo kaso spesífiko, evitando ku bo mester bini Aqualectra direktamente. Tur bishita na nos Sentro di Kliente por sosodé solamente a base di sita trahá adelantá. Lo no por atendé kliente sin sita ya komo ku e kantidat di kliente ku por atendé lo ta limitá basá riba medidanan tumá tantu pa gobièrnu komo Aqualectra mes. Ora traha sita lo tene kuenta ku bo plachi di dia i tur medida ku ta na vigor.

 

Kompensashon “Danki na Bo”

E kampaña pa klientenan apliká pa e kompensashon “Danki na Bo” ta sigui.  Klientenan ku tin konekshon post pago òf Pagatinu (ku konekshon di awa) por apliká riba aqualectra.com. Por apliká tambe dor di yama 0800-0135 i skohe opshon “Kompensashon Danki na bo.” Lamentablemente Aqualectra mester sera temporalmente su Sentronan Temporal na Sambil, Vinik Plaza i Kaya Grandi di Otrobanda.  Tampoko por kontinuá ku e bishita den barionan. P’esei Aqualectra ke pidi klientenan ku tin Pagatinu so pa keda pendiente. Aqualectra asina e situashon ta pèrmití lo bolbe habri Sentronan Temporal afin ku abo por tuma bo kompensashon.

Aqualectra adaptá pero kla pa sirbi

Adaptando nos servisio manera menshoná, nos lo sigui hasi nos máksimo esfuerso pa bou di e sirkunstansianan aktual, garantisá kontinuidat di servisio, bienestar di nos klientenan pero tambe seguridat i salú di personal di Aqualectra i nan famia.

Pa kualkier pregunta, klarifikashon òf remarke semper por yama nos number di kontakto (grátis) ku ta 0800-0135, por bishitá nos wèpsait www.aquaelctra.com, manda nos un e-mail na info@aqualectra.com òf akudí na nos página di Facebook Aqualectra Utility.

This site uses Akismet to reduce spam. Learn how your comment data is processed.

error: Content is protected !!
%d bloggers like this: