Partido Inovashon Nashonal (PIN) a haña rason ku e lei di konsenso di COHO ta kontra Statüt i ku e intenshon ku COHO ta, pa Hulanda manda riba Kòrsou.

 

Partido Inovashon Nashonal (PIN) a haña rason ku e lei di konsenso di COHO ta kontra Statüt i ku e intenshon ku COHO ta, pa Hulanda manda riba Kòrsou.  Raad van State, e órgano di konseho di mas haltu riba konseptonan di lei den Reino, a duna un konseho devastador pa gobièrnu Ulandes i partikularmente e sekretario di estado, sr. R. Knops. Remarkabel ta ku Raad van State ta konfirmá tur e atvertensianan ku Suzy Römer a duna promé, ainda den gobièrnu, riba e lei di CHE i despues estando for di gobièrnu riba e lei di COHO. 

 

Inapropiá

Raad van State (RvS) a konsehá sr. Knops pa no entregá e lei di COHO na e 4 parlamentonan, pasobra e ta defisiente (schiet tekort). Manera PIN a bisa e palabra COHO ta nifiká “desabilitá” (=mank) i esei RvS tambe a bisa bon kla. RvS ta mustra ku e proposishon di lei COHO ta “niet passend”, esta inapropiá i ku e lei lo no kondusí na resultadonan eksitoso. Lokual PIN a splika numeroso biaha.

 

Outoridat 

RvS ta mustra ku e lei ta duna outoridatnan ekstenso na un ehersito di àmptenar Ulandes i ku en bes di fortifiká e paisnan, lo e lei debilitá e paisnan. Riba e punto aki tambe PIN a mustra hopi biaha. 

Raad van State a indiká ku e repartishon di outoridat entre COHO i gobièrnu i CFt.  no ta klá (onduidelijk). Ademas e órgano “Ulandes independiente” COHO i gobièrnu di e país Kòrsou lo kai bou di e minister di asuntonan interior di Ulanda.   Kon ta posibel ku gobièrnu di Kòrsou a akspetá esaki? Ta esaki PIN a indiká dia e tabata den gobièrnu tokante e CHE i yamé rekolonisashon, paso ora un otro país ta manda den bo país, bo país a bira su kolonia.  PIN a keda ku mes posishon pafó di gobièrnu ora ku a kambia e makiyahe di CHE i yam’e COHO.

 

Kondishon pa sosten

RvS ta mustra ku Ulanda por kambia kondishonnan pa sosten kon ku e ke i ora e ke. Esaki ta otro punto ku PIN a trese dilanti ku no ta aseptabel.

 

Komposishon di COHO

RvS ta mustra ku e paisnan no tin influensia riba e komposishon di e COHO. Manera nos sa, ta tres persona nombrá pa Gobiernu Ulandes den e COHO ta disidí pa tantu gobièrnu komo parlamento di Kòrsou ta kiko ta sosodé riba nos pais.

 

Konseho di Minister di Reino i Statüt

E konseho di RvS ta konosí for di 3 di mart 2021. A skond’é pa nos. PIN ta spera ku tur hende por komprondé dikón no a presentá e konseho promé ku elekshon. Reino ta un estado di derecho i no por bai kontra e lei mas haltu di Reino, ku ta reglá e relashon entre e paisnan, e outoridat di Reino i e outoridatnan di e país! 

 

Renegosashon di COHO i Landspakket

Gobièrnu nobo di Kòrsou mester renegoshá ku Ulanda i ta den bon posishon pasa hasi esaki basá riba e konseho di RvS. PIN ta bolbé mustra ku e landspakket manera e ta, ta un reseta pa pobresa. Den e pakete ta baha penshun, baha nivel di bida, kobra hende un kontribushon pa bai dokter òf hospital. Tur esaki lo pone e hende pober lomba kontra di muraya. Kemen, mester renegoshá e paquete yama “landspakeket” tambe. 

Nos ta desea e gobièrnu nobo sabiduria pa ku renegosashon i ta spera ku pronto tin un akuerdo konformé lei i benifisioso pa Kòrsou.