Ta ekspandé periodo di balides di sédula i reibeweis di kua e fecha límite di balides ta kai den e periodo tras di lomba
Ta ekspandé periodo di balides di sédula i reibeweis di kua e fecha límite di balides ta kai den e periodo tras di lomba
Geplaatst op 09 April 2021 dor di Ministerio Maneho di Gobernashon, Planifikashon i Servisio Públiko
WILLEMSTAD – Asuntunan Públiko (Kranshi), manera ta konosí, debí na medidanan pa evitá mas plamamentu di COVID-19, no ta dunando servisio di sédula ni reibeweis. P’esei Asuntunan Públiko, pa medio di esaki, ta partisipá lo siguiente:
Pa loke ta trata sédula
- Sédulanan di kua e fecha límite di balides ta kai den e periodo di 1 di desèmber 2020 pa 1 di yüni 2021. Ta keda bálido pa 9 luna despues di e fecha di vensementu manera indiká riba e sédula.
Pa loke ta trata reibeweis
- Personanan ku a pasa eksámen práktiko ku éksito despues di 30 di sèptèmber 2020 i ku no a haña nan reibeweis for di Kranshi ainda. Por partisipá na tráfiko pa un periodo di 9 luna a base di e resultado di su èksamen práktiko. Pèrkurá si pa tin e resultado di èksamen práktiko huntu ku bo.
- Personanan ku a pasa “rijproef” i ku no a logra kambia esaki ainda, por usa e resultado di e “rijproef”.
- Tur reibeweis di kua su fecha límite di balides ta kai den e periodo despues di 30 di sèptèmber 2020 ta keda bálido pa 9 luna despues di e fecha di vensementu manera indiká riba e reibeweis.
- E prolongashon aki ta konta eksklusivamente pa reibeweis optené aki na Kòrsou.
- Rekordatorio na tur persona ku tin pèrmit bálido pa permanesé (temporal) na Kòrsou mester tin huntu ku nan tur momento e dokumento di e desishon i nan identifikashon ku a kaduká.
Asuntunan Públiko di Ministerio di Maneho, Planifikashon i Servisio Públiko ta sigui hasi su máksimo esfuerso pa atendé tur su klientenan lo mihó posibel.
Pa mas informashon semper por tuma kontakto ku Bentana di Informashon na Lokèt di Pèrmit via e-mail infovergunningenloket@gobiernu.cw.