Karta pa Kolegio Ehekutivo di Frakshon Coffie

 

 Na Kolegio Ehekutivo di Entidat Públiko di Boneiru

Parke Wilhelmina #1

Kralendijk

Bonaire C.N

 

Apresiabel Kolegio Ehekutivo,

 

Mi frakshon a tuma nota ku diferente direktoradonan di Entidat Públiko ta ubiká den edifisionan partikular.

Di otro banda tin diferente edifisio di Gobièrnu, pará bashí i for di uso. Relashoná ku esaki, mi ta hasi uso di artíkulo 45 di nos Reglamentu di Òrdu, pa hasi e siguiente preguntanan:

 

1. Konseho Insular por haña un inventarisashon di tur e edifisionan di Gobièrnu ku nan balor? 
2. E edifisionan aki ta riba balansa di nos kuentanan anual i pa kua montante?
3. Kolegio por duna Konseho Insular un bista tambe di kua edifisio ta den uso i uso pakiko?
4. Kua ta e direktorado- i/o servisionan ku ta alohá den edifisionan ku nó ta di Gobièrnu?
5. Kolegio por fasilitá Konseho Insular tur e kontraktnan ku tin, di moda ku nos por haña klaridat pa loke ta e durashon di e kontraktnan i tambe e preis di hür ku ta paga?
6. Ki maneho Kolegio Ehekutivo ta hiba pa ku alohamentu di nos direktorado- i servisionan?
7. Kuantu lo kosta pa konstruí un edifisio sentral pa hinka tur e servisionan aden di moda ku por realisá e idea di “one-stop-shopping” i asina alsa kalidat, efisiensia i efikasia di nos servisio na komunidat den e mas amplio sentido di palabra?
8. Si konstruí un edifisio sentral den kuantu tempu lo por paga bèk e kapital di  e invershon aki?
9. Si tin di e edifisionan di Entidat Publiko Bonaire di hür ku tersera, kuantu fondo kada un ta generá pa Entidat Públiko Boneiru?
10. Kua ta e propiedatnan ku ta bou di Bonaire Overheidsgebouwen BOG?
11. E propiedatnan menshoná na pregunta 10 ta balorá di moda ku nan ta riba balansa di nos kuentanan anual i pa kua montante?
12. Te ainda e kontrakt ta eksistí di 1 dòler pa luna pa e edifisio kaminda Cuba Compagnie ta i si ta asina pa kuantu aña e kontrakt aki ta kore?

 

Mi ta konta di risibí kontestanan oral, al kaso den e próksimo reunion públiko di Konseho Insular

 

Atentamente,

 

___________________________

 

Désirée E. Coffie

Miembro di Konseho Insular Boneiru