Sala Multifunshonal na Fòrti nombrá komo Sala Jerry Lasten

 

Sala Multifunshonal na Fòrti nombrá komo Sala Jerry Lasten

Geplaatst op 11 May 2021 dor di Ministerio Asuntunan General i Promé Minister

Willemstad – Djaluna, dia 10 di mei último, Direktorado di Komunikashon i Informashon di Gobièrnu di Kòrsou (C&V) a hasi inougurashon ofisial di e Sala Jerry Lasten na Fòrti. Ta trata aki di e sala multifunshonal ku ta keda usá pa entre otro konferenshanan di prensa di Gobièrnu di Kòrsou, seshonnan di Fòrti Habrí, ‘webinar’ i diferente otro seshonnan di Gobièrnu.
E bunita seremonia aki a konta ku presensia di Minister Presidente demishonario Eugene Rhuggenaath, e yunan di sr. Jerry Lasten, huntu ku representantenan di e tim di maneho di Ministerio di Asuntunan General i algun miembro di e tim di produkshon di e aktual Direktorado di Komunikashon i Informashon di Gobièrnu.

Na bida, señor Gerard Albert Anthony Lasten, mihó konosí komo Jerry Lasten a sa di establesé un fundeshi sólido pa loke ta trata komunikashon gubernamental i suministro di informashon en general. Un di su lemanan ku a kore semper komo liña kòrá den tur su trabounan, tabata ekselensia i profeshonalismo; “Chèk, dòbel chèk i bolbe chèk”.

Na inisio di añanan ‘70, sr. Jerry Lasten a inisiá su karera den Gobièrnu durante 6 luna komo hefe di atministrashon di “Antilliaanse Onderwijs Instellingen” i despues di poko tempu, komo direktor. Komo direktor di e institushon aki, ya su kualidatnan komunikativo tabata evidente i den dos aña di tempu su esfuersonan a kondusí ku e instituto a krese den un organisashon ku mas di 3.000 studiante.

Djis despues, Sr.Jerry Lasten a bira Hefe Interino di e departamento di Relashon Públiko di teritorio insular di Kòrsou na aña 1974,  kaminda el a sòru pa un reorganisashon kompleto di e departamento. Na 1977,el a keda enkargá komo kolaboradó di informashon pa e servisio di konsulta eskolar (Schooladviesdienst) na Kòrsou. Komo kolaboradó di e servisio aki, sr. Jerry Lasten a introdusí entre otro diferente programanan semanal di radio i televishon sumamente kualitativo i informativo. Tambe sr. Jerry Lasten a start e famoso revista ‘Énfasis’ ku a konosé un trayekto sigur di algun dékada.

Di aña 1982 te ku 1989, sr. Jerry Lasten a fungi komo hefe di servisio di informashon di Gobièrnu di Antia Hulandes kaminda, no solamente el a sòru pa reorganisá e servisio, pero tambe a sòru semper di mantené un maneho di komunikashon skèrpi i efikas. Despues di a laborá den Gobièrnu, sr. Jerry Lasten a establesé su propio kompania di komunikashon i merkadeo. Bou di e kompania aki, sr. Lasten a duna servisio na klientenan grandi tantu lokal komo internashonal. Pa medio di e kompania aki, sr. Jerry Lasten entre otro a asesorá empresanan manera Setel, CPA i CURINDE pero tambe a sigui brinda su servisionan i konosementu na Gobièrnu di Antia i na Konseho Insular.

Durante e inougurashon, e Direktorado a revelá un mural den e sala multifunshonal, dediká na sr. Jerry Lasten. Tabata un momentu sigur emoshonante pa e yunan di sr. Jerry Lasten, pa por mira e rekonosimentu na nan tata i skucha e impakto ku ainda su trabounan tin pa ku komunikashon gubernamental. Pa e Direktorado di Komunikashon i Informashon di Gobièrnu di Kòrsou, ta un gran orguyo i honor di por tin e ehèmpel di sr. Jerry Lasten komo fundeshi pa kada bes sigui mehorá e komunikashon entre Gobièrnu i pueblo di Kòrsou.