Ars Oratoria Advanced Toastmasters Club a instalá direktiva 2021-2022

Ars Oratoria Advanced Toastmasters Club a instalá direktiva 2021-2022

 

Willemstad, djadumingu 11 yüli e direktiva nobo pa Ars Oratoria Advanced Toastmasters Club (Ars Oratoria Advanced TMC) 2021-2022 a keda instalá ku e tema “Anchor infinities”. Presidente entrante pa Ars Oratoria Advanced TMC DTM Maureen Da Costa-Gomez-Arion ta esun ku huntu ku direktiva ta bai guia e aña edukashonal di Toastmasters aki.

Sra. Da Costa Gomez a indiká den su diskurso komo presidente entrante, ku e posibilidatnan pa desaroyá bo mes ta infinito i ku esaki semper ta keda e meta primordial di kada un miembro.

 

Ars Oratoria Advanced TMC dia 21 mei 2021 a kumpli 17 aña i ta un klup avansá ku ta duna guia pa forma lidernan den area di liderasgo i komunikashon. E klup ta konsentrá su mes pa forma treinernan ku por sigui traspasá konosementu na otro i no solamente riba e abilidat pa duna un diskurso.

 

E personanan ku ta forma parti di e direktiva nobo 2021-2022 di Ars Oratoria ta

Presidente: DTM Maureen Da Costa Gomez-Arion

Vise Presidente Edukashonal: Valerica Jansen

Vise Presidente Miembresia: Zandra Chantalou

Vise Presidente Relashonista Publiko: Miloushka Rosario

Sekretaria: DTM Aileen Ludowica-Martina

Tesorero: DTM Nerissa de Haak-Sanches

Sargento di Evento: DTM Oswin Benito

Presidente saliente: Claudette La Reine-Martina

 

Tambe na okashon di e evento aki a duna rekonosementu na 3 distinguido Toastmasters ku ta baluartenan di Toastmasters kual ta DTM Eric Rene, DTM D’arcy Lopes i DTM Johanna Dambruck. E 3 persona nan aki ta pilarnan di Toastmasters na Kòrsou i tambe Karibe en general. Ars Oratoria ta ekstende palabranan di gradisimentu pa tur loke nan ta nifiká pa e klup.

 

Direktiva nobo di Ars Oratoria Advanced TMC huntu ku su miembronan ta kla pa ranka sali ku nan aña edukashonal nobo pa asina logra e metanan ku e miembronan tin i tambe logra e metanan di klup. Pa mas informashon tokante Ars Oratoria Advanced Toastmasters Club por bishitá e paginá di facebook Arsoratoriatmc.