Kòrsou Salú ta invitabu pa selebrá World Wellness Weekend 18 i 19 di Sèptèmber, 2021: Sea Inspirá, Sintibu bon!

Kòrsou Salú ta invitabu pa selebrá World Wellness Weekend 18 i 19 di Sèptèmber, 2021:

Sea Inspirá, Sintibu bon!

Den kuadro di World Wellness Weekend dia 18 i 19 di Sèptèmber 2021, Kòrsou Salú ta organisá un weekend kargá ku varios aktividat virtual i ta stimulá kada persona pa keda inspirá i hasi algu pa bo mes i bo famia. E tema lo ta World Wellness Weekend Curaçao: Sea Inspirá, Sintibu Bon! Lo tin charlanan, diskushonan den panel, lo duna tayer i tambe lo invitá pa hasi aktividatnan den naturalesa manera hiking, bai laman, bishitá un hofi i buska berdura fresku, i hopi mas. Tur e aktividatnan virtual lo ta via zoom i via di e Facebookpage @KorsouSalu. Durante di e programa di Radio Kòrsou Salú na  Radio Krioyo 89.7 ku ta tuma lugá djasabra atardi 5or lo para ketu na e tema di Wellness. 

Dikon Wellness?

Wellness ta kondusí na un pueblo mas salú, pa medio di prevenshon i estilo di bida mas saludabel i wellness por nifiká un fuente di entrada pa nos pais pa medio di desaroyo di e industria di wellness. Wellness ta un palabra ku ta ilustrá e akshonan kontinuo di aktividatnan, eskoho i estilo di bida ku ta kondusí na un estado di salu holistiko. Un estado di salú holistiko ta kaminda salú mental/emoshonal, físiko, spiritual, medio ambiente, naturalesa, aspektonan intelektual, sosial, laboral i finansiero di un individuo ta den bon balanse. Pues enbes di ta sobrebibi, bo ta prosperá. Den un palabra, esta “Wellness”, bo ta akapará tur e komponentenan ku ta kontribuí na un hende próspero! Un plan pa desaroyo di Kórsou komo un pais di Wellness i un programa pa konsientisa nos pueblo pa biba i kome mas salu manera Kunukito na skol, den kas i den bario ta plan nan i programanan bon ku ta bale la pena sigui duna atenshon na nan. Tantu pa nos poblashon komo pa nos ekonomia, Industria di Wellness por trese kuné un transformashon ku ta pone ku nos gastunan di salubridat por baha paso nos hendenan ta mas konsiente i ta prevení malesanan dor di tin un lifestyle mas salú i di otro banda hendenan ta paga pa bin for di eksterior pa disfrutá di nos servisionan i produktonan di wellness ku nos ta brinda. 

Sea Inspirá, Sintibu bon!

Durante di e Wellness Weekend, Kòrsou Salú lo uni forsa ku diferente otro inisiativa manera Kuida Kurpa i Kunukito, pa asina kontribuí na e movementu di Wellness. Un movementu ku ta kolektivo pa yega na un Kòrsou Salú, un korsou ku hende felis, salu, i próspero. Durante di e weekend lo tin webinarnan pa komparti konosementu i informashon, pero tambe ta stimulá kada persona pa hasi algu ku ta lague sintie bon. Sea ta hasi ehersisio, kana den naturalesa, tuma un masashi, kome un plato saludabel, hasi yoga, dal un smoothie, i asina tin hopi kos ku por hasi.  

 

E idea ta pa bo presta atenshon na kon bo kurpa i bo mente ta komportá ora bo pone atenshon na bo mes. Imaginabu sinti asina tur dia i tur ora. 

Banda di para ketu na e aspekto di e individuo, nos ta bai splikabu kon Kòrsou por bira un lider riba e tereno di industria di Wellness. Industria di Wellness ta generá un entrada di mas di 4 miljard pa islanan den karibe i Kòrsou ta perde di gana di esaki. Industria di Wellness ta akapará tur aktividat ekonomiko ku ta atrae personanan ku ta en buska di bienestar pa nan mes, manera turismo, korda riba nos laman, produktonan saludabel i natural, produktonan pa uso korporal, konosementu, Spa, ets. Imaginabu Kòrsou atrae bishitantenan ku ta bin pasa algun dia of siman pa mehora nan estado mental i físiko, disfruta di naturalesa i regresa nan pais bek ku un sintimentu di proseperidat ku ta yudanan sigui ku nan bida diario. 

Mei mei di un pandemia kaminda nos tin un situashon di emergensia, bo no por hasi tur loke bo a kustumbra di hasi, bo no por kumpra tur loke bo ke, paso bida a bira karu, bo a subi di peso dor di lock down, bo tin hopi malestar dor di suku, preshon, kolesterol, bo no tin trabou, i hopi kos mas. Tur esaki ta hasibu sinti infelis, tristu i te hasta desespera. Pero imaginabu ku bo tin algun kos den bo mes man pa alivia algun di e sintimentunan aki. Bai kana den naturalesa ta yudabu pensa i ordena bo ideanan, mira solushonan, sintibu mas miho paso bo a move i bo organonan ta traha mas miho, imaginabu bo tin yerba fresku for di bo kura pa traha te of un kos di bebe pa bo muchanan, bo ta piki yambo, bonchi, batata dushi for di bo propio kura i kome esaki, bo ta sigui un charla of un kurso ku a insipirabu i a lagabu deskubri un parti diferente, asina nos por keda akumula tur tipo di ehempelnan kon bo por mehorá bo situashon dor di hasi algun adaptashon. 

Tokante Korsou Salu

Kòrsou Salú ta un movementu pa konsientisashon riba aspektonan ku ta influenshá nos salú i bienestar. Aplikando siensia, medisina integral i énfasis riba prevenshon nos lo logra un pueblo konsiente, salú, i felís. Na Mei 2021 a lansa e movementu aki pa medio di un konferensia virtual titulá Bo Tripa i Gluten un Enemigu Silensioso? I awor ta turno Wellness Weekend ku e titulo Sea Inspirá, Sintibu Bon!

Like e page riba Facebook: Kòrsou Salú pa sigui e desaroyonan i pa download e programa!

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: