Korte di Hustisia ta hala orea di legisladó riba derecho igual di tur hende.  Derechi igual pa tur hende ta fundamental pa un estado di derecho demokrátiko 

 

Korte di Hustisia ta hala orea di legisladó riba derecho igual di tur hende. 

Derechi igual pa tur hende ta fundamental pa un estado di derecho demokrátiko 

PIN ta un partido ku for di su rais ta para pa inovashon, adelanto i trato igual pa un i tur. PIN su prinsipionan, basá riba su ideologia di Humanismo Kristian, ta mustra ku tur siudadano di e pais akí mester por gosa di derechinan igual, irespekto nan rasa, kredo, religion, genero, òf preferensia seksual. Kaso hudisial pa formalisá e union entre dos hende di mesun sekso Den e kaso ku un pareha di mesun sekso i Human Rights Foundation Curaçao a demandá Pais Kòrsou pa personanan di mes sekso por kasa, 

Korte di Hustisia a diktá 13 di sèptèmber último ku -pa falta di un altenativa legal akseptabel- e eksklushon di parehanan di mesun sekso for di matrimonio sivil ta kontra artikulo 3 di nos Areglo di Estado, ku ta prohibí diskriminashon. Tambe Korte a dikta ku pais dor di e eksklushon ei ta aktua illegal kontra di demandantenan. Pa PIN loke ta trata e derecho pa formalisá e union entre dos hende di mesun sekso pa lei sivil, esta den un matrimonio/kasamentu na Kranshi, ta simplemente bisá e derecho di ta igual pa tur persona irespekto nan sekso. 

Durante e último kampaña di elekshon lamentablemente hopi partido i personanan ku tin influensia a skohe pa hasi politikeria rondó di e tema di igualdat humano akí, enbes di koregí e deskriminashon ku ya nos konstitushon ta prohibí. Durante debatenan polítiko den temporada di kampaña PIN a splika ku e ta pro derecho igual i ta kontra di tur klase di deskriminashon. Pa e echo akí influensiadónan religioso/polítiko a baha pisá riba PIN i tur otro ku a tribi di trese dilanti ku mester salbaguardiá derechonan fundamental di tur hende. Asta dos ‘pastor kristian’ a duna konseho di voto kontra di esnan pro derecho igual. 

E influensiadónan akí a fomentá divishon, rabia i asta miedu bou di nos poblashon, desviando e tema for di unu di e derecho fundamental di igualdat ankrá den nos leinan i tratadonan internashonal pa unu di religion ku ta varia segun su kreensia i dògma. Durante temporada di kampaña algun partido ku aktualmente tin representashon den parlamento i ku inkluso tin miembronan di e komunidat di LGBTQ+ na puestonan prominente, a skohé konsientemente pa no fihá posishon. Ora a enfrentá nan ku e tema akí simplemente a bisa ku esaki no ta un tema oportuno òf, hasiendo politikeria, a laga aparentá di ta kontra. E aktuashon akí di prokastrinashon i no hèndel e batata kayente a sòru pa mantenshon di e desigualdat den derecho humano, esta derecho di matrimonio sivil òf sikiera union sivil òf registrashon di pareha. 

Ta p’esei awor tin un veredikto kla i raspá ku ta nada mas ku un halá di orea pa e poder legislativo. E veredikto ta rekonosé ku e lei aktual di matrimonio sivil ta bai kontra di e prinsipio di igualdat i tambe kontra e prohibishon di deskriminashon, prinsipionan ku ambos ta ankra den nos Areglo di Estado. 

Ku sentimentu miksto nos a tuma nota di e veredikto 

Di un banda nos por ta satisfecho ku por fin Korte di Hustisia a papia un palabra kla. Korte di Hustisia a enfatisá ku nos ta un estado di derecho, kaminda tur hende, asta si tin deseo opuesto di un mayoria, tin derechinan fundamental i ku e derechinan akí ta konta asta si ta trata derechi di un menoria. Di otro banda ta un bergwensa pa nos estado demokratiko ku ta e poder hudisial mester duna un veredikto riba un asuntu legislativo, esta di gobièrnu i parlamento komo legislador, ku pa años kaba polítikonan ta papia riba dje sin por a yega na hasi e kambionan nesesario pa korehí un lei ku no ta respetá e derecho di igualdat ku ya ta ankrá den nos Areglo di Estado. Nos ta spera ku esaki por ta un wake up call pa politikonan pa stòp ku politikeria i hiba un polítika madurá pa logra hasi e kambionan nesesario pa logra un pais den kua tur siudadano por alkansá nan máksimo potensial, esta un Kòrsou Dotá. 

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: