PERSONAL DI KUIDO DI COVID DI CMC LO TA INVITADO SPESHAL NA CIBC FIRSTCARIBBEAN SU WALKING DINNER 2021

 

PERSONAL DI KUIDO DI COVID DI CMC LO TA INVITADO SPESHAL NA CIBC FIRSTCARIBBEAN SU WALKING DINNER 2021

 

Willemstad, 19 di Sèptèmber 2021 – CIBC FirstCaribbean lo tin un delegashon di Curaçao Medical Center (CMC) su unidatnan di kuido ku ta atendé ku pashèntnan di COVID, komo invitado di honor na CIBC FirstCaribbean su Walk for the Cure 2021 Walking Dinner.

 

E invitashon pa un delegashon di unidatnan di COVID di CMC tei komo invitado di honor ta pa balorá e trabou balioso, dedikashon i sakrifisio ku nan a hasi durante di e pandemia di COVID-19. 

 

E CIBC FirstCaribbean Walk for the Cure Walking Dinner lo tuma lugá djamars 5 di Oktober pa 6’or di atardi.  No ménos ku kuater restorant den e área di Rif Fort lo partisipá na e evento anual aki pa rekoudá fondo pa pashèntnan ku kanser.

 

CIBC FirstCaribbean’s Walk for the Cure, e esfuerso mas grandi den region pa rekoudá fondo pa e lucha kontra di kanser, ta selebrá su di 10 aña. 

 

E toke duná na na Walk for the Cure na Kòrsou e aña aki ta ku lo e ta un “Walking Dinner” teniendo na kuenta nos amor pa dushi kuminda.  E restorantnan ku e aña aki ta partisipá ta Chanterelle Bistro, Gondola, Porto Restaurant Curaçao i Steak and Ribs Rif Fort.

 

E eskoho pa un Walking Dinner ta tene na kuenta e protokòlnan poné pa garantisá salú públiko miéntras e partisipantenan ta gosa di platonan sukulento prepará pa e mihó kòkinan.  Tur fondo generá pa medio di e Walk for the Cure Dinner ta bai pa Stichting Prinses Wilhelmina Fonds.

 

Timba Engelhardt, Country Head di CIBC FirstCaribbean na Kòrsou a bisa ”Stichting Prinses Wilhelmina Fonds meskos ku otro organisashon karitativo ta den un lucha komo resultado di e donashonnan ku a baha miéntras na mes momentu ku demanda pa nan sosten ta sigui oumentá.  Nos tim ta trahando duru pa hasi e evento un éksito rotundo i nos ta spera di por yama nos partisipantenan bon biní  na e Walking Dinner.  Nos a pensa ta bon oportunidat pa mustra nos apresio i gratitut na nos héroenan ku a bin ta traha dia den dia afó na CMC, hasiendo tur loke ta nan alkanse pa salba bidanan.”

 

Por kumpra karchi pa e CIBC FirstCaribbean Walk for the Cure Walking Dinner na CIBC FirstCaribbean su sukursal na De Ruyterkade 61.  Pa mas informashon por yama 433-8000 òf marketing.curacao@cibcfcib.com.

 

CIBC FirstCaribbean Walk for the Cure di e aña aki ta parti di e selebrashon di e banko su di 10 aniversario komo rekoudadó di fondo pa e kousa noble aki ku ta tuma lugá den tur e 16 komunidatnan kaminda e banko ta establesé.  Durante di e 9 añanan tras di lomba a rekoudá no ménos ku USD$2.9 mion.

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: