Ban planta awe pa mañan

 

Ban planta awe pa mañan

 

Fundeshi fuerte pa desaroyo di agrikultura i krio di bestia

 

Apesar ku durante su periodo komo Minister di Salú, Medioambiente  i Naturalesa (SMN), sra Camelia-Römer, di Partido Inovashon Nashonal (PIN, a pone e fundeshi fuerte pa desaroyo di agrikultura i krio di bestia, ainda gobièrnu no a dal niun paso konkreto pa sigi ku esaki. Si tene na kuenta e krisis ekonómiko ku su rais den otro krisis di salú, desaroyo di agrikultura i krio di bestia ta aún mas urgente.

 

Desaroyo ku tiki invershon

 

Pa sigi ku desaroyo di agrikultura e invershon nesesario ta minimal. Produkshon lokal ta rekerí konosementu i abilidat, tereno pa planta, awa i simia. Durante e 2 último añanan a kapasitá mas ku 250 hende lokal den diferente método, manera órganiko regenerativo, agroforestería, hydroponia i permakultura. Kòrsou tin alrededor di 2,000 hektaria destiná pa agrikultura. A yega na un tarifa speshal pa awa. Nos leinan fiskal ta duna eksonerashon pa importashon pa rekursonan agríkola, manera mashin, simia, fertilisante, etc.

 

Produkshon lokal di bèrdura i fruta 

Tambe tin konseptonan di lei kla pa regulá molèster i kuido di medio ambiente ora ta praktiká agrikultura. Ademas tin konsepto di lei  fitosanitario i di uzo di awa di supsuela klá pa kana e trayekto legislativo. Meskos ta konta pa modernisashon di e dekreto riba prohibishon di importashon di fruta i bèrdura, ku ta perkurá pa lokual keda produsí na Kòrsou haña sufisiente merkado lokal. 

 

Praktikamente e úniko kos ku falta ta determinashon i un esfuerso kombiná entre ministerionan di SMN, TTiPU i Desaroyo Ekonómiko pa jump start ku agrikultura i krio di bestia lokal.

 

E maneho aselerá ta di gran importansha pa dil ku nos retonan aktual. Pa duna algun ehèmpel: Den 6 siman despues ku inisiá plantamentu di salada i knòlchi ya por abastesé henter merkado lokal. Den 4 luna òf menos despues di planta batata dushi, yambo, kalalu, diferente tipo di bonchi, diferente tipo di e yerba pa kushiná, kòmkòmber salada, kòmkòmber chikí, berehèin, promentòn, promèntè,  maïshi, i algun tipo di tomati, ya tin kosecha.  Pues, plantamentu ta duna fruta den algun luna.

 

 

Krio di galiña

 

Meskos ta konta pa krio di galiña. Ya tin un industria floresente na Kòrsou di krio di galiña pa produkshon di webu. Ta relativamente fasil pa produsí karni di galiña lokal den kantidatnan sufisiente pa abastesé henter merkado lokal. Ya tabata hasi tramiténan pa prepará servisio veterinario pa matamentu di galiña.

 

Entre 150 pa 200 mion florin pa aña pa nos mes agrikutornan

Ta konosí kaba ku entre 150 pa 200 mion pa aña lo keda sirkulá den nos ekonomia ora desaroyá agrikultura i krio di bestia. Banda di esei ta krea un kantidat di servisionan mará na agrikultura, relashoná ku distribushon lokal, prosesamentu di fruta i bèrdura i eksportashon.

 

Produktonan pagabel

Ta opvio ku produkshon lokal ta hasi posibel tambe pa ofresé produktonan salú i pagabel na nos komunidat.  P’esei mester sigi stimulá konsumo di fruta i bèrdura lokal ku programanan manera Kunukito na Kas, na Skol i Kultivo sin Tera.

 

PIN ta urgi gobièrnu pa implementá e lokualnan falta pa agrikultura krese i krea kuponan di trabou i entrada.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: