Den tempu di krisis pais no ta sirbí ku desinformashon

 

 Den tempu di krisis pais no ta sirbí ku desinformashon

Minister di Finansa su funshon ta krea konfiansa den ekonomia i no deskonfiansa!

 

Partido Inovashon Nashonal (PIN) a musta durante kampaña elektoral riba e nesesidat pa tin un gobièrnu ku hendenan eksperenshá i ku konosementu.Kòrsou, manera rònt mundu, ta pasando den un krisis di salù ku  a kousa un krisis ekonomiko severo. Ta konosí ku e pandemia C19 a afektá hospitalnan i personal  di kuido rònt mundu desproporshonalmente. Pa solushoná e retonan hospitalario, mester di un gobièrnu fuerte tantu pa lokual ta trata salubridat públiko, komo maneho finansiero. Lamentablemente Kòrsou ta karesé di ambos kapasidat. 

 

Pais Kòrsou ta DOÑO di Hospital CMC

Pa algun tempu kaba eksponentenan di MFK, tantu gobernante komo parlamentarionan, ta uza e MO di ataká individuonan i institutonan, lansa desinformashon i mustra dede riba gobièrnunan di turno, sin solushoná e problemanan. Esaki ta e kaso ku e retonan ku CMC ta konfontando. Na varios okashon PIN ta tende eksponentenan di gobièrnu hasi komo si fuera ku e hospital CMC no tin doño. Sinembargo, un biaha mas por konstatá ku ta trata aki di e MO pa instigá pueblo kontra su mes hospital.

 

Den un karta fechá 17 aprel 2017 gabinete Pisas I (unu) a úrgi SONA pa lanta un Fundashon Holding HNO ku tin e akshonnan di un entidat pa maneho di edifisio i terenonan di e hospital, esta Vastgoed Maatschappij,  i unu pa maneho di e hospital, esta Exploitatie en Transitie Maatschappij – CMC,  den su man. Na 2017, gabinete Rhuggenaath a siguí ku ehekushon di e desishon aki i traha pa finalisá e hospital. Den e kuadro aki gobièrnu, despues di a ser apoderá pa medio di un dekreto, a lanta Stichting HNO Holding ku e enkargo pa tene e akshonnan di gobièrnu  den entidatnan HNO Vastgoed i den HNO exploitatie & Transitie Maatschappij (CMC). Pues, ta gobièrnu despues di a kana e proseso ku lei ta dikta den e ‘Code Corporate Governance di Kòrsou’ a lanta e fundashon Holding HNO ku e tarea  pa vigilá  interés di gobièrnu den e hospital. Ta gobièrnu despues di a kana e prosedura deskribí den lei  ta nombra miembronan di Hunta di Supervishon den e Fundashon Stichting HNO Holding. Ta e Minister di Salú di Kòrsou, konformé e statutonan, mester aprobá nombramentu di gerensha di e fundashon! 

 

Na su turno, e Stichting HNO Holding si a kumplí ku e desishon ku kabinetenan  Asjes, Whiteman, Koeiman, Pisas i seguidamente kabinete Rhuggenaath a sostené. Stichting HNO Holding a lanta e entidatnan HNO Vastgoed i HNO exploitatie en Transistie Maatschappij (CMC) konformé desishon di e gobiernunan.  

 

Finansiamentu pa kaba di traha i operashonalisá CMC

E hospital ku durante mas ku shen aña a sirbi su meta Sehos, tabata pasando den un krisis finansiero ku, apesar di tabatin profeshonalnan kapasitá, no tabatin e infrastruktura pa garantisá un kuido hospitalario na nivel. P’esei gobièrnu tabatin e obligashon di finalisá e konstrukshon di CMC i pone esei na servisio di komunidat. 

 

Komo ku desishonnan deskabeyá tumá na momentu di konstrukshon di hospital no a tene kuenta ku varios aspekto kostoso, manera kompra di Colon, trahamentu di un garashi di mas ku un piso, kambionan di e vianan ku ta kondusí na hospital ora a traha e hospital riba Hamelbergweg, ku mester a kibra parti di SEHOS etc., mester a buska fondonan adishonal pa por a kaba e konstrukshon. Ta konformé su statutonan e entidat HNO Vastgoed a buska i haña finansiamentu pa por a kaba e hospital i pone esaki den servisio. Na novèmber 2019, apenas algu mas ku dos aña despues ku gabinete Rhuggenaath a tuma asiento, a hasi e hospital operashonal. Pa evitá subida di prima pa pueblo, a tuma un kantidat di medida entre otro riba tereno di  “uitzending” di pashènt, remedi genériko  i  pago na speshalistanan.

 

Den un ‘Akte van schuldbekentenis di 16 maart 2020” e relashon di debe ta formalisá!

Fundashon Holding a tuma tur debe for di gobièrnu ku ta direktamente relashoná ku hospital nobo. Esaki después ku kalkulashon di e suma a keda hasi tantu pa SOAB komo departamento di finansas. Kon gobièrnu por bisa ku e debe no ta formalisá? Tin korespondensia amplio riba esaki den file di gobièrnu.

 

Nèt na tempu

Awe kisas hopi hende no ta realisá kon bendishoná Kòrsou ta na moment uku e krisis di Corona a yega Kòrsou. Na mart 2020 Kòrsou a keda konfrontá ku krisis di Covid. Pa evitá eskalashon di e krisis mester a tuma varios medida, entre otro hasi gastu pa por a akapará personanan ku keda afektá gravemente dor di e viro Corona. Manera ta konosí na luna di yüli 2020 Kòrsou a konosé un kantidat rèkort di kasonan di Corona ku a kondusí na hospitalisashon i kuido intensivo. Konsekuentemente maneho regular di hospital CMC mester a keda adaptá pa por dil ku e kasonan di Corona. Na su turno eseinan a afektá entradanan di CMC desproporshonalmente.

 

Konklushion

No ta Hunta di Supervishon, ni gerensha, ni empleadonan di CMC a krea e krisis di Corona. No ta nan a tuma desishon pa bai Otrobanda ku konsekuensia ku kosto pa e hospital a subi drastikamente! P’esei PIN ta desaprobá e forma ku insistentemente gobièrnu i algun parlamentario ta ataká e instituto vital aki, ku desinformashon, gañamentu i kalumnia. PIN ta úrgi gobièrnu i parlamento pa asumí responsabilidat i manehá nos kuido hospitalario di un manera honesto i kuerdo, manera rònt mundu esaki ta tumando lugá. 

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: