CAft: “Mas lihé posibel presupuesto di Aruba”

 

 

CAft: “Mas lihé posibel presupuesto di Aruba”

 

Oranjestad – Ekonomia di Aruba ta rekuperando bon. E kantidat di persona i negoshi ku ta hasi un apelashon na e medidanan di sosten ta bahando. Pa e motibu aki e Kolegio di supervishon finansiero di Aruba (CAft) ta sali for di e punto di salida ku e medidanan aki ta finalisá den e di kuater kuartal di 2021. Ainda CAft no a risibí e proyekto di presupuesto di 2022. Ta nesesario pa Aruba tuma medida pa realisá balansa presupuestario den 2022, pa den e añanan siguiente e por kuminsá paga bèk e debe nashonal, kual promé ku e krisis di COVID-19 ya tabata hopi haltu. CAft ta urgi gobièrnu pa traha e proyekto di presupuesto mas pronto posibel, pa por aprobá esaki promé ku 15 di desèmber di e aña aki.

 

Proyekto di presupuesto 2022

Segun e Konstitushon di Aruba, mester a presentá e proyekto di presupuesto di 2022 na Parlamento dia 1 di sèptèmber. Te awe ainda esei no a tuma lugá. CAft ta enfatisá importansia di aprobashon di un presupuesto na tempu. Ku rekuperashon di turismo, ekonomia tambe ta mehorá bèk. Aruba ta sali di punto di bista di un kresementu ekonómiko di 13,9% pa 2021, i den algun sektor ya por nota ku no tin sufisiente personal. P’esei CAft ta insistí pa riba un término mas kòrtiku posibel finalisá e sosten salarial. Tambe ta importante pa kobra bèk mas pronto posibel e supsidionan di gastunan di salario ku a paga di mas. 

 

E debe nashonal di Aruba aworaki ta monta na AWG 5.600 mion. Pa no laga e debe nashonal sigui subi – pa kuminsá – ta nesesario pa yega na un balansa presupuestario pa aña presupuestario 2022. P’esei ta di importansia pa, ademas di stimulá rekuperashon ekonómiko, e gobièrnu nobo tuma medida pa redusí gastu tambe. E reformanan den e agènda di ehekushon mester kontribuí na mehorashon di e finansa públiko i redukshon di e debe nashonal. CAft ta urgi gobièrnu pa inkluí den e proyekto di presupuesto un planifikashon di mas aña i pa hasi transparente ta kiko ta intenshoná di logra ku e reformanan.

 

Sostenibilidat di debe nashonal

Aruba ta pará dilanti di un gran reto pa redusí e debe nashonal i mas pronto posibel logra hiba esaki na un nivel sostenibel. Aruba mester realisá un surplus mas lihé posibel, ya ku esei ta e úniko manera pa redusí e debe nominal i e gastunan di interes mará na dje. Pa tuma un ehèmpel, aworaki Aruba ta paga 5% di su PIB pa aña na interes. Esaki ta bai a kosto di otro gastunan riba presupuesto, manera gastu di enseñansa òf gastu pa kombatimentu di pobresa. Mas aleu CAft ta enfatisá e importansha di realisá for di 2023 un surplus di finansashon di 1%.

 

Reformanan

E reformanan manera a keda akordá den e pakete di pais (landspakket) ta esensial pa stimulá kresementu ekonómiko. Mester redusí e gastunan di hasimentu di negoshi (costs of doing business) i gastunan atministrativo. Importante ta un reforma fiskal integral ku énfasis riba simplifikashon. Akumulashon di legislashon a krea un sistema kompleho ku un gran kantidat di gastu dedusibel, eksonerashon i eksepshon. Esaki ta oumentá e karga atministrativo pa e dunadónan di trabou i pa Servisio di Impuesto i ta difikultá simplifikashon i outomatisashon. Digitalisashon i interkambio di dato entre e diferente servisionan di gobièrnu lo reforsá e kapasidat di akshoná di Servisio di Impuesto i, konsekuentemente, lo oumentá kumplimentu di obligashon (compliance). Reformanan den seguridat sosial i kuido tambe ta nesesario pa garantisá sostenibilidat di e sistema aki. Ta di sumo importansia pa introdusí riba tèrmino korto ekonomisashon den e sistema di kuido di AZV, komo e promé paso dirigí riba un kuido sostenibel.

 

CAft a hasi un bishita na Aruba dia 28 i 29 di òktober 2021. A hiba kòmbersashon ku, entre otro, Gobernador, Minister di Finansa i Kultura, Konseho di Minister i e Komishon Parlamentario di Finansa, Organisashon Gubernamental, Kultura i Deporte (CFOCS). Banda di esaki CAft a hasi tambe un bishita na Banko Sentral di Aruba (CBA), Banko di Seguro Soshal (SVb) i Aruba Hotel and Tourism Association (AHATA). Promé ku e biahe di Kolegio aki, e presidente a hasi un bishita na e parke nashonal Arikok. Durante di e bishita a inform’é di e retonan di konservashon di naturalesa i e potenshal ekonómiko di e parke aki pa turismo.

 

Click here / Klik aki pa wak kuantu aktividat interesante e muchanan ta hasi https://www.facebook.com/Total-Care-Institute-454507071305043
Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: