Riba Fecha 7 novèmber pa limpia e graf memorial di Almirante Luis Brion

 

 

Djadumingu 7 di novèmber benidero un grupo di yu-di-tera, prekupá pa e manera ku aki na Kòrsou nos a lubidá di duna sufisiente balor na nos heruenan, a uni forsa pa trese kambio den e kuadro aki. Mirá den e lus aki, un asuntu ku urgentemente ta eksihí nos atenshon ta e situashon deplorabel di e graf memorial di nos herue Gran Almirante Luis Brion; inkluso e aria ku ta rondon’é. E graf aki ta situá riba tereno di plantashi Rozentak, ku e tempu ei tabata pertensé na famia Brion. E tabata keda masoménos riba e tereno suitwèst di Shell di awendia. Riba e tereno menshoná tin un total di 3 graf di kua esun mas grandi ta pertenesé na Luis Brion. Na aña 1881 ta saka restonan di Luis Brion i hiba nan ku barku Benesuela riba petishon di  Presidente Antonio Guzman Blanco. Esaki despues ku a kumpli ku tur e rekisitunan ofisial rekerí. Den e kuadro aki a lanta un Komishon konsistiendo di entre otro Sr. W. Boyé i Bisnietunan di Brion, miéntras ku finalmente Gobernadó J.H.A. W. Baron van Heerdt tot Eversberg ta duna e pèrmit nesesario. Durante di un akto respetuoso i impresionante pueblo di Kòrsou ta despedí di su herue Gran Almirante Luis Brion, miéntras ku na 1882 ta hiba Luis Brion huntu ku otro kompñero di lucha, e general irlandes Daniel Florencio O’Leary, Panteon Nacional na Caracas den un seremonia aun mas grandi. 

Henter e asuntu aki ta haña un ekstra dimenshon awor ku próksimamente otro yu-di-tera, e ilustre luchadó pa libertat General en Hefe Manuel Carel Piar, ku a batayá eksitosamente na lado di Luis Brion i liberá nan Isla Kòrsou di un invashon di un armada Ingles, tambe lo bai Panteon Nacional na Caracas, Benesuela. E akto aki lo bai kompañá pa seremonianan grandi ku ya ta na marcha na nos pais vesino. Mirá den e lus aki ta na su lugá nos aki na Kòrsou tambe demostrá rèspèt i duna honor na nos heruenan nashonal manera e.o. Brion, Tula i Piar. Pues, di e manera aki nos ta habri kaminda pa por konosé nan ideal den forma mas konsiente, loke finalmente lo hasi nos mentalmente mas kapas pa aportá positivamente na progreso di nos Pais. Den e kuadro aki awor mester mira e proyekto “Ban Limpia Graf di Brion”, di kua e kordinashon general ta den man di Fundashon General Piar. Ta trata aki di un proyekto ku asignashon popular na kua un-i-tur, sin distenshon di kredu por partisipá.       

 

 

 

 

Click here / Klik aki pa wak kuantu aktividat interesante e muchanan ta hasi https://www.facebook.com/Total-Care-Institute-454507071305043

 

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: