Cft: “Aprobá e presupuesto e aña aki ainda”
Cft: “Aprobá e presupuesto e aña aki ainda”
Philipsburg – Sint Maarten a presentá un proyekto di presupuesto pa 2022 na Kolegio di supervishon finansiero Kòrsou i Sint Maarten (Cft) i konforme e Lei di Reino di supervishon finansiero (Rft), e mester aprobá esaki e aña aki ainda. Cft ta insistí pa prinsipalmente redusí gastu den e presupuesto i subi entrada, entre otro pa medio di mehoransa den kumplimentu ku deber di paga impuesto. Gobièrnu di Sint Maarten ta enfrentá retonan grandi, pero e por konta ku sosten di Hulanda i e fondo fidusiario pa ehekutá e reformanan nesesario i traha strukturalmente riba mehorashon.
Ekonomia di Sint Maarten ta rekuperando bon. Pa e aña aki IMF ta kalkulá un kresementu ekonómiko real di 4% i pa otro aña 15%. Otro aña ta ferwagt 1 mion di pasahero krusero i 1,1 mion moveshon di pasahero na aeropuerto. Pa un rekuperashon mas grandi, renobashon di e aeropuerto ta esensial. Tambe ta importante pa invertí den e próksimo añanan den infrastruktura di karetera i den haf.
Aprobá presupuesto na tempu
Sint Maarten tin hopi difikultat pa aprobá su presupuestonan i dokumentonan di responsabilisashon finansiero na tempu. Sint Maarten a aprobá e presupuesto di 2021 riba 9 di sèptèmber. Segun e Rft esaki ya mester a tuma lugá 15 di desèmber di e aña anterior. Sint Maarten a entregá e proyekto di presupuesto 2022 riba 27 di òktober na Cft. Cft ta insistí ku presupuesto 2022 mester ta aprobá na tempu, pa gobièrnu asina risibí e mandato di Parlamento pa ehekutá e presupuesto.
Debe públiko i supsidio pa kosto di suèldo
Sint Maarten a risibí ANG 118 mion na sosten di likides den forma di un fiansa di Hulanda kontra di 0% di interes. E debe públiko di Sint Maarten ta oumentá te ANG 1.398 mion, loke ta aproksimadamente 79 porshento di e produkto interno bruto. Pa kada habitante esaki ta un suma di mas ku ANG 23.000. Un parti importante di e sosten a keda usá pa supsidio pa kosto di suèldo. Na 2020 a paga empresanan ANG 72 mion na supsidio di kosto di suèldo, i pa 2021 a presupuestá un montante di ANG 53 mion. Entrante 1 di òktober a para e supsidio di kosto di suèldo. Sint Maarten tin sí un retraso supstansial den tratamentu di petishonnan di supsidio i determinashon final di e supsidionan di kosto di suèldo. Cft a insistí ku mester eliminá e retraso aki promé ku 1 di desèmber 2021 i tambe ku mester indiká kua parti di e supsidio di kosto di suèldo ta pagá di mas.
Presupuesto balansá na 2023
Pa 2022 Sint Maarten ta ferwagt ainda un défisit presupuestario supstansial. Pa limitá mas kresementu di e debe, Sint Maarten mester redusí su gastunan i subi su entrada, na promé instansia pa medio di ampliamentu di medida ku ta subi kumplimentu ku deber di paga impuesto. Pa 2023 Sint Maarten mester realisá balansa riba su presupuesto i pa e añanan despues un surplus, di moda ku por kuminsá paga e debenan. Un balansa riba e servisio regular di e presupuesto tin komo benefisio ku Sint Maarten lo tin derecho pa hasi uso di fiansanan di kapital, riba kua Hulanda lo inskribí.
Fondonan di kuido
E situashon finansiero di e fondonan riba tereno di kuido na Sint Maarten ta preokupante. E défisitnan di e Seguro di Gastunan di Malesa (ZV), Seguro di Aksidente (OV) i e Fondo di Gastunan di Malesa di Empleadonan Públiko Penshoná (FZOG) ta subi fin di 2021 te un montante kalkulá na ANG 328 mion. Esaki ta un situashon insostenibel. Pa e motibu aki riba 1 di yanüari 2022 lo subi e límite di suèldo pa e areglo di gastu di malesa i di aksidente te ANG 120.000, lo alineá e kontribushon pa empleadonan den sektor públiko a esun den sektor privá i mandatarionan polítiko lo bai kontribuí den e seguro pa gastu di malesa. Ademas ta di importansia pa riba término kòrtiku bai reemplasá remedinan spesífiko ku remedinan genériko. Hasiendo esaki, Sint Maarten por ekonomisá un montante anual di aproksimádamente ANG 12 mion.
Maneho finansiero
Cft ta enfatisá e importansia di mehorashon di maneho finansiero den koperashon ku e organisashon temporal di trabou, saliendo for di e punto di bista ku kada deadline ku a keda poné, realmente lo keda alkansá. Cft ta positivo tokante di e medidanan ku ta inkluí den e Pakete di Pais (Landspakket), inkluso lantamentu di un programa na departamentu di impuesto dirigí riba kumplimentu ku deber di paga impuesto. Ta nesesario pa e diskushon ku Hulanda tokante di hasimentu di sosten disponibel keda finalisá mas lihé posibel, di moda ku Sint Maarten por kuminsá ku e proyektonan esensial aki. Pa loke ta trata maneho finansiero, Cft a pidi atenshon tambe pa maneho di aktivonan, inkluso e propiedatnan di kapital for di e fondo fidusiario.
Fondo fidusiario
Apesar di e krísis di COVID-19, e último añanan aki a logra hasi progreso ku e proyektonan di e fondo fidusiario. Rekonstrukshon di e terminal di aeropuerto a kuminsá i e lo finalisá den 2023. Ku interes Cft a tuma nota di proyektonan ku ta pone kapital di trabou i fiansanan suave na disponibilidat di empresanan chikitu i mediano i ku ta mehorá kapasidat sosial di e poblashon pa esaki por defendé su kurpa. Sierto proyekto den esfera di planifikashon urbano lo rekerí un periodo ku ta yega mas leu ku 2025.
Miembronan di Cft Kòrsou i Sint Maarten di 2 te ku 4 di novèmber a bishitá Sint Maarten i a hiba kòmbersashon ku Gobernador interino, Minister di Finansa, Konseho di Minister i e komishon finansiero di Parlamento. Cft a bishitá tambe National Recovery Plan Bureau (NRPB), Princess Juliana International Airport (PJIA), Kontrolaria General di Sint Maarten (ARS) i ehekutadó di Seguro Sosial di Gastunan di Malesa (SZV).
Riba 1 di novèmber Cft Bonaire, Sint Eustatius i Saba a hasi un bishita na Saba i a hiba kòmbersashon ku Kolegio Ehekutivo, Konseho Insular i e kompania di koriente di Saba.
