KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNUNOTISIA

Karta ku a bai pa BC di parti di Konsehal Daisy Coffie.

 

Kolegio Ehekutivo di Entidat Públiko Bonaire

Parke Wilhelmina #1

Kralendijk

Bonaire C.N

Apresiabel Kolegio

Komo miembro di Konseho Insular, mi ta sumamente desapuntá ku nos Kolegio Ehekutivo no ta logra kumpli ku algun di su obligashonnan legal ku e tin pa ku Konseho Insular. Esaki ta debilitá funshonamentu di e Konseho Insular, e ta baha e nivel di kontenido di funshoná, e ta stroba e tarea di tene supervishon i kontrolá Kolegio Ehekutivo den ehekushon di maneho i kuné e ta stroba nos supervishon i kòntròl di e uso legal i efektivo di tantu fondonan komo biennan di e komunidat.

 

Fundamental den esaki ta ku Kolegio Ehekutivo tin e obligashon di informá Konseho tur loke Konseho ta deseá ku eksepshon di informashonnan ku ta konfidensial o ta peligrá seguridat di nos komunidat. Esaki ta ankrá den WOLBES.

Artíkulo 159 te ku 164 Wolbes ta duna Konseho Insular e outorisashon i kompetensia pa hasi pregunta, hasi interpelashon i hasi investigashon riba gobernashon.

Artíkulo 171 ta preskribí ku Kolegio Ehekutivo mester duna Konseho tur informashon rekerí i responsabilisá nan maneho i to­ma di desishonnan.

Artíkulo 172 ta regla e supervishon di gezaghèber pa garantisá kumplimentu di prinsipionan di bon gobernashon.

Artíkulo 182 ta regla e responsabilisashon di gezaghèber na Kon­seho Insular di e maneho i desishonnan ku e ta tuma.

Artíkulo 183 te ku 186 ta regla e fluho di informashon ku Kontro­la­ria General mester duna Konseho Insular.

 

Si nos ta kumpli ku e lei- i reglanan aki, e ta duna nos -pero mas tantu nos komunidat- e garantia i trankilidat ku nos ta hiba un gobernashon na nivel, ku vishon i ku e proseso demokrátiko di “check and balance” ta funshoná, esta Kolegio Ehekutivo ta ehekutá i Konseho Insular ta supervisá, kontrolá i kaminda ta nesesario korigí.

 

Lamentablemente mi mester konstatá ku esaki strukturalmente no ta e kaso. Preguntanan no ta keda kontestá òf ta kontestá mitar ku e konsekuensia ku un òf otro tópiko/tema nunka por keda finalisá na un manera efikas i efektivo. Nan ta keda kologá. Igualmente ta e kaso ku risibimentu di informashon i/o dokumentonan riba un òf otro tema/tópiko. Kuantu biaha ta sosodé ku mester posponé tratamentu di un tema sea den reu­nion di komishon fiho, sea den reunion di forma opinion i tin bes asta den reunion di toma di desishon, pasobra simplemente Konseho Insular no ta disponé di tur informashon nesesario pa yega na un desishon  balansá i responsabel.

 

E situashon aki ta frustrante, iritante i ta pone komunidat pèrdè tur konfiansa den su gobernashon. Konfiansa ta algu sumamente importante pa krea komprenshon i sosten den komunidat pa e maneho ku Kolegio Ehekutivo ta hiba. Ya pa basta tempu mester konstatá ku spesialmente koalishon -pa mantené e asina yamá “stabilidat gubernamental”- ta bai di akuer­do numa ku maneho defisiente, maneho mankaron ku opser­vashonnan manera “mi ta bai di akuerdo si, pero……” Klaramente un aktitut di laga bai numa pa no krea konflikto polítiko.

 

E situashon aki no ta sano i meresé tur atenshon di Kolegio Ehekutivo inkluso nos gezaghèber. E aktitut aki ta krea e impre­shon ku Kolegio Ehekutivo ta neglishá su tareanan i ku e peliger ta ku en bes di e desaroyo bai den e direkshon ku mas i mas nos ta prepará nos mes pa tuma tareanan over basá riba prinsi­pio di supsidiaridat i desentralisashon, nos ta tuma nota di un tendensia di sentralisashon di tareanan. No ta esei tabata e intenshon ora nos a skohe e status aktual di e relashon estatal ku Hulanda.

 

Mi ta spera ku e karta aki ta un “wake-up call” i ku den e tem­pu­nan benidero nos lo hasi tur esfuerso pa trese mehorashon den esaki na bienestar di funshonamentu di bon gobernashon.

 

Atentamente,

 

 

___________________________

Désirée E. Coffie

Miembro di Konseho Insular Boneiru

639114718427035"
639114718427035"