Resúmen di aktividatnan di Amak durante 2021
Resúmen di aktividatnan di Amak durante 2021
Durante mas ku un aña pueblo di Kòrsou i e mundu farandulero a pasa momentunan difísil, ya ku durante di e periodo di krísis tur hende mester a hasi sakrifisio.
Un dje konsekuensianan direkto di e pandemia Covid 19 ta ku kantidat grandi di yunan di tera a pèrdè nan trabou i den e situashon aki, músikonan i artistanan tambe no tabata tin entrada pa kria nan famia.
E pandemia a krea un ambiente di tenshon den hopi kas di famia, i awor ku e sifranan di kontagio ta oumentando, a bira nesesario pa Gobièrnu tuma medidanan adishonal lokual ta enserá ku no por permití aktividatnan farandulero tuma lugá ku presensia di mas ku 75 persona.
Pa lokual ta trata 2021, mester bisa, ku ounke Amak no tabatin ningun entrada finansiero, danki na koperashon di algun instansia, i trabounan boluntario di parti miembronan di direktiva i e komishonnan di Amak, tòg por a logra mantené funshonamentu di Amak aplikando tambe e aspekto di kreatividat.
Direktiva a elaborá un plan di maneho di 5 aña, den kua aspektonan, manera efisiensia ,redukshon di gastunan operashonal i reorganisashon finansiero i futuro kontinuashon di formashon musikal na hóbennan ta amplio deskribí.
Pa lokual ta trata e aktividatnan di direktiva di Amak durante 2021, por hasi menshon di e reunionnan ku regularmente a tuma lugá ku outoridatnan i instansianan di gobièrnu, manera e.o. ku Meo, Servisio di Kultura, pa diskutí e proyektonan ku Amak i Instituto pa Formashon Musikal .
Na 2021 aktividatnan farandulero na dos okashon, di 19 di yüni pa 27 di ougùstùs i di 19 di òktober pa 23 di desèmber por a tuma lugá ku sierto restrikshonnan i na momento aki den 2022 atrobe tin medidanan adishonal lokual ta enserá ku no por permití aktividatnan farandulero tuma lugá ku presensia di mas ku 75 persona.
Promé ku nos menshoná algun proyekto positivo ku a tuma lugá, ta bon pa nos para ketu, na e músikonan, ku den 2021 a bai laga nos i ku sigur a duna un aporte signifikante na un desaroyo positivo di nos farándula di Kòrsou.
No ke rekòrdá aki nan: Wendell Ricardo mihó konosí komo Didi pianista di Forsa Dos, Jose Rosales, Ced Ride, Anselmus Boy Dap i Renaud Cijntje.
Proyektonan ku den 2021 bou di sirkunstansianan hopi difísil a keda realisá, ta e.o.
Tumba revival 2021
Ta fresku den nos memoria ku e Tumba Revival Festival ku a tuma lugá di 8 pa 12 di febrüari 2021 na Curaçao Festival Center den koperashon ku Servisio pa Asuntunan Kultural, a trese hopi alegria den hopi kas di famia.
Pa duna Pueblo di Kòrsou tòg un alivio i un forma pa relahá den e situashon aktual na Kòrsou a konsekuensia di medidanan relashoná ku e Pandemia, Direktiva di AMAK a elaborá un proyekto pa huntu ku Gobièrnu di Kòrsou i partnernan, durante 1 siman ta bai duna un rekuento musikal di tur e 50 tumbanan ganador.
Ta bon pa hasi menshon, ku direktiva di Amak a skohe, Maestro Gregory Colina, pa tuma direkshon di e Orkesta All Star, na su enkargo, komo ku e ta areglista ku mas areglo di e ganadornan durante e dos último dékadanan, ademas pa su eksperensia den direkshon di orkestanan grandi na vários okashon anterior.
E otro orkesta formá pa hóbennan di e agrupashon musikal Excellence reforsá ku e sekskshon di brass bou di direkshon di maestro Gedion Chandler, a kompañá e komposishonnan di promé ku 2001.
E proyekto aki a resultá unu hopi eksitoso\, danki na sosten di Gobièrnu di Kòrsou, Massive productions, Licores Maduro M.L.S, Venequip i Coca Cola.
Festival Un Kanto pa Kòrsou.
Un otro proyekto eksitoso tabata festival Un Kanto pa Kòrsou ku a tuma lugá djasabra 26 di yüni 2021 den e parti “Den Plùs” na Festival Center, i ku a keda realisá, ku koperashon di Servisio di Kultura i Instituto pa Formashon Musikal.
Ganador di e festival a resultá Rosalys Libiee Casimiri, ku un komposishon di Eldridson Eugenio, Amor lo prevalesé.
Un tremendo festival ku a keda sostené pa Gobièrnu di Kòrsou, Trusz by Rich, Licores Maduro, M.L.S, Venequip i Coca Cola.
Tantu e Tumba Revival komo e festival “Un Kanto pa Kòrsou” a keda transmití den un forma direkto pa kanal Direkt TV i Tele Curaçao.
Un danki spesial na nos plantanan di TV lokal i tur media sosial ku semper a brinda nos espasio.
Finalmente direktiva di Amak ta sumamente agradesido na proyektonan positivo ku a tuma lugá na bienestar di nos farándula durante 2021;
Nos ta referí aki na proyektonan na interes di un bon desaroyo di nos sektor farandulero sea direktamente tabata na enkargo di Amak o tabata inisiativanan di músikonan miembro, o otro instansianan partikular.:
= Formashon di komishon “Na interes di farándula” i komishon Amigunan di tumba, den kua vários miembro a partisipá ku proposishonnan balioso.
= Lès di brass Trombon i trompèt, supsidiá pa Prins Bernhard fonds, na kua 10 hóben entre 12 pa 18 aña a risibí instrukshon musikal seka maestro Joselo Jimenes.
= Lès pa hóbennan pa siña toka piano, perkushon, bas i kitara .
Formashon musikal na hóbennan di e proyekto di SIGE ( Sentro pa inovashon i guia de enseñansa);
=Lès pa siña traha areglo bou di guia di Maestro Gregory Colina.
=Buki di instrukshon pa por siña e “tumbaonan” di e diferente ritmonan, skibi pa Maestro Gregory Colina.( entrega ofisial tin ku tuma lugá próksimamente).
=Rekonosimentu pa artistanan ku a graba durante 2021, un inisiativa di Sherwin Kòrá Faneyte.
=“Trombone challenge” tremendo inisiativa di Giovanni Atalita i Hector Samson ku a kousa hopi reakshon positivo.
Resumiendo pues, ounke e situashon ta difísil, ku ayudo di mentenenan kreativo i positivo lo por logra resultadonan positivo.
Ban nos tur ban uni forsa pa 2022 bira un aña eksitoso. Na mes un momentu nos ta deseá tur Músiko un Felis i Próspero aña 2022.
5 di yanüari 2022
Na nòmber di direktiva di Amak
Manfred Feko Gomes Giovanni Atalita.
