GOBIÈRNU DI KÒRSOU TA TENE ENKUENTRO VIRTUAL KU SEKRETARIO DI ESTADO VAN HUFFELEN

WILLEMSTAD – Riba djaweps 20 di yanüari 2022, a tuma lugá un enkuentro virtual entre Sekretario di Estado enkargá ku Relashonnan den Reino i Digitalisashon, sra. Alexandra van Huffelen i Promé Minister sr. Gilmar Pisas, Vise Promé Minister sra. Ruthmilda Larmonie, Minister di Finansas sr. Javier Silvania i Minister Plenipotensiario sr. Carlson Manuel. Esaki a tuma lugá despues ku sra. Van Huffelen ya a komuniká promé biaha ku Promé Minister Pisas via di telefòn dia ku el a huramentá. Durante e reunion virtual tambe tabata presente – tantu di parti di Hulanda komo di Kòrsou – e tim di konsehero i otro personanan enkargá ku negosiashonnan den kuadro di e konsepto di Lei di konsenso di Reino COHO.

E reunion tabata unu kaminda e timnan a keda presentá na otro i a papia di un forma transparente ku otro. Entre otro a papia tokante di e último desaroyonan pa ku e pandemia di COVID-19, e reunion di Konseho di Minister di Reino planiá pa dia 4 di febrüari 2022, negosashonnan riba refinansiamentu di e debenan di pais i tambe a papia di idea i deseonan relashoná ku temanan rondó di e konsepto di Lei di konsenso di Reino COHO i di e ‘Landspakket’.

Den luna di yanüari mes lo sigui hiba e deliberashonnan riba e puntonan akí i lo fiha pa yega na entendimentu promé ku e reunion ariba menshoná di 4 di febrüari 2022.