Celebracion Dia di Betico 2022, Minister di Cultura Xiomara Maduro: “Nos talentonan a briya den un union spectacular riba tarima durante Manifestacion Cultural pa pueblo na honor di nos Libertador Betico Croes”
Celebracion Dia di Betico 2022, Minister di Cultura Xiomara Maduro:
“Nos talentonan a briya den un union spectacular riba tarima durante Manifestacion Cultural pa pueblo na honor di nos Libertador Betico Croes”
ORANJESTAD – Dialuna anochi a tuma luga e Manifestacion Cultural Virtual – Dia di Betico 2022 pa conmemora e fecha natalicio di Nos Libertador Gilberto François ‘Betico’ Croes. Un programa espectacular a ser prepara pa Comision Celebracion Dianan Nacional y presenta pa nos talentonan local. E pueblo di Aruba por a sigui esaki via nos canalnan di television local y medionan social.
E anochi a inicia cu palabra di bon bini di e maestro di ceremonia, e simpatica Sandra Suarez, kende a haci un bunita presentacion manera semper. Nos Himno ‘Aruba Dushi Tera’ a wordo interpreta pa e hobennan Georvin y Jorienne Angela. A sigui cu un elocuente discurso di Minister di Finansa y Cultura, Sra. Xiomara Maduro, caminda e mandatario e enfoca riba e union cu Betico Croes semper a papia di dje y cu a percura pa uni e nacion den su lucha pa Status Aparte. Awe pais Aruba ta den un reto grandi pa recupera di e pandemia, e mandatario den su discurso a pidi Aruba pa ban uni un bes mas mirando cu ta den union nos pueblo ta haya e forsa di coherencia pa hunto nos por trece Aruba bek riba pia.
E hoben Lizienne Webb a interpreta un bunita cancion titula ‘No tin nada pa kibre’. Un composicion di Danilo Vrolijk y areglista Johnny Scharbaay.
E hoben Stephanie Quant cu su bunita bos a presenta e cancion ‘Aki nan tin fiesta’, composita pa Danilo Vrolijk y aregla pa Jersey Isenia.
E programa tabata yena cu talentonan local y e cancion ‘ Aruba’ a wordo canta pa e hoben Xenon Daal, cual ta uno composita pa Jossy Herrera dfm y aregla pa Franklin Granadillo/Lucho Argote.
E programa a sigui cu declamacion di un poesia cu e titulo ‘ Union ta Forza’, cu e palabranan bon escogi di e hoben David Quant sigur a inspira un y tur cu tabata sigui e programa.
Un fantastico baile di Simadanza a wordo presenta pa e hoben bailarinanan di e Grupo di Baile “Club di Movimiento Aruba” bou coreografia di Ferdinand Franca.
E anochi a sigui crece cu presentacion di mas talentonan local, na momento cu e duo Chris Kross y Amy Richards a presenta e cancion ‘Curashi’, un composicion di Amy Richards y cual Chris Kross ta e areglista.
A sigui cu presentacion di e artista Eltienne Yarzagaray cu e cancion ‘Forsa di Shelo’, un composicion di Eltienne Yarzagaray y aregla pa Miguel Genser. Un cancion cu letranan impactante y conmovedor.
Un otro sublime presentacion tabata di Zulaika Geerman cu a cancion ’Mi deseo’ composita y aregla pa su propio persona.
Nicole Martines de Kort a interpreta cu un excelente bos e cancion ‘Ban protega nos Milager’, un composicion di Danilo Vrolijk y aregla pa Migi Boasman.
Grupo di Baile “Club di Movimiento Aruba” den su segundo acto a presenta un baile ‘Loco Loco y Boca di Pueblo’ bao coreografia di Ferdinand Franca, un presetacion cu a capta bon atencion di esnan cu a a sigui e programa.
E conocido artista Miguel Genser tambe a duna un presentacion magnifico durante e Manifestacion Cultural dedica na Betico Croes interpretando e cancion ‘Speranza’, composita pa su mes persona y aregla tambe pa su persona y pa Maikol Lugo.
Maicky Oliva acompaña pa Pop Corn Dancers a trece ambiente cu e cancion ‘Cara cara’, composita pa Maicky Oliva/Chendell Beaumont y aregla pa Hubert Thiel treciendo e manifestacion den un ambiente de celebracion.
E maestro Danny Koolman tabata e director musical di e grupo di musico cu a compaña nos artistanan cu a presenta nan cancion y a deleita un y tur cu a sintonisa e Manifestacion Cultural na television y medionan social. Palabra di danki y reconocimento na e coro a acompaña e cantantenan durante nan presentacion.
Pa finalisa tabata un berdadero placer pa un y tur di por a gosa di nos artistanan local manera Chendell Beaumont, Robert Jeand’or y Rocco Franken canta den union pa asina clausura e Manifestacion Cultural y cu un tremendo show di baile di Pop Corn Dancers.
E presentacion di e artistanan a demostra un union grandi di talentonan brindando honor y reconocimento na e personahe cu e Manifestacion Cultural tabata dedica na dje, cu pa medio di uni e nacion den e lucha a logra Aruba su Status Aparte.
Un danki un bes mas na tur nos talentonan local di artista, musico, poeta y bailarinanan pa por a haci e manifestacion cultural uno espectacular y uno digno honor na di Nos Libertador Betico Croes.