KOLEGIO PA PROTEKSHON DI DATONAN PERSONAL REALISÁ TAMBE NA KÒRSOU

WILLEMSTAD – djabièrnè 28 di yanüari 2022, a hasi instalashon ofisial di e ‘College Bescherming Persoonsgegevens Curaçao’. Esaki a tuma lugá netamente riba Dia Internashonal di Privasidat di Datonan ku ta keda selebrá na vários pais na mundu.

For di 1 di òktober 2013, e lei ‘Landsverordening Bescherming Persoonsgegevens’ a drenta na vigor aki na Kòrsou. Esaki ku e ophetivo pa krea konsiensia i promové mihó práktikanan di privasidat i protekshon di datonan personal. E rèspèt di privasidat di kada persona ta un derecho fundamental ankrá den nos areglo di estado.

Despues di a fungi un temporada komo ‘implementatiemanager’ pa lanta e Kolegio, a nombra sra. drs. Ing. Shirley Cecilia direktor di Sekretariado CBP pa kontinuá ku implementashon di e Kolegio. Komo parti di e implementashon minister Ornelio Martina di ministerio di Maneho di Gobernashon, Planifikashon i Servisio Públiko, a instalá ofisialmente e miembronan di e kolegio menshoná. E kolegio akí ta konsistí di personanan íntegro ku tin konosementu di tareanan ku mester ehersé konforme e ‘Landsverordening Bescherming Persoonsgegevens’. E kolegio ta konsistí di sra. mr. Caroline Fiévez komo presidente, sr. drs. ir. Jacques Heide komo miembro i sra. drs. Manon de Lanooi komo miembro. E instalashon a keda konkretisá na momento ku kada persona di e prestigioso kolegio akí a risibí nan Landsverordening di nombramentu serka di minister Martina.

Pa mas informashon por manda un mail na info@cbpcuracao.org i gustosamente e organisashon lo duna informashon na pueblo di Kòrsou.

Riba pòrtrèt (drpd): sra. Manon de Lanooi (miembro), sra. Caroline Fiévez (presidente CBP), minister Ornelio Martina, sra. Shirley Cecilia (Direktor Sekretariado), sr. Jacques Heide (miembro).