Prome Minister Evelyn Wever-Croes: RECEPCION NA HONOR DI JOKE BRANDT, EMBAHADORA DI REINO NA NEW YORK PA UNITED NATIONS (UN)
Prome Minister Evelyn Wever-Croes:
RECEPCION NA HONOR DI JOKE BRANDT, EMBAHADORA DI REINO NA NEW YORK PA UNITED NATIONS (UN)
Diahuebs anochi a tuma luga na Museo Archeologico Nacional Aruba (MANA), un recepcion cultural na honor di e Embahadora di Reino na New York pa United Nations (UN), señora Joke Brandt. Esaki ta e prome biaha cu un representante pa Reino ta bishita Aruba cu e proposito pa crea un miho comprendemento di e necesidadnan di Aruba y haya un miho sentido di e multiculturalismo di Reino Hulandes pa asina duna mas contenido y forma na su funccion como representante pa Reino Hulandes.
Na yegada na Museo Archeologico, Prome Minister Evelyn Wever-Croes hunto cu señora Joke Brandt, a wordo ricibi pa e director di museo señor Pancho Geerman cu a duna Prome Minister y señora Brandt un recorido di e museo na unda nan por a aprecia diferente obra.
Despues di e recorido, a sigui un ceremonia na unda señora Brandt a hiba palabra sigui pa Prome Minister di Aruba.
Durante su discurso, Prome Minister a yama un bon bini na señora Brandt y a gradici’e pa a tuma riba su mes e iniciativa pa bin wak y scucha con e lo por asisti Aruba na un miho manera. Esnan presente por a acerca señora Brandt y comparti cu ne tur nan deseonan y preocupacionnan.
E tema principal di e anochi aki tabata arte, cultura y genero na unda a enfoca riba arte y cultura den e prome parti di anochi sigui pa genero den e segundo parti. Durante e secion di arte y cultura, artistanan local tabata tin e oportunidad di haci nan presentacion, mustrando asina con Arubianonan ta biba, experencia y interpreta arte.
E siguiente parti di anochi tabata dedica na e tema di genero cu pa Aruba ta un tema di suma importancia. Señora Joke Brandt hunto cu e otro representantenan femenino di UN, ta di gran apoyo pa loke ta trata e desaroyo y implantacion di e “gender policy” aki y a priminiti Aruba pa yuda den e ehecucion di esaki.
Den cooperacion cu Universidad di Aruba, Gobierno ta organisando huun evento importante den cuadro di Dia Internacional di Hende Muhe na Maart 2022. Durante e evento aki lo presenta e “gender policy” pa prome biaha den historia di Aruba.
Finalmente, Prome Minister a gradici un biaha mas señora Brandt pa su apoyo valioso, como tambe tur cu a organisa e evento exitoso aki. Tambe el a gradici su coleganan pa e apoyo y tur esnan presente pa e amor y dedicacion cu cada un tin pa pais Aruba.
Prome Minister Evelyn Wever-Croes a expresa, “ta e amor y dedicacion di cada persona ta loke ta duna Gobierno e forsa pa saca pais Aruba di e crisis y hib’e na e progreso y bienestar cu tanto e isla mester”.
