Análisis di krímennan di impakto haltu.

 

KOMUNIKADO DI PRENSA 100 /2022
23 febrüari 2022
Análisis di krímennan di impakto haltu.
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ
Polis ta kontinuá analisando e krímennan di impakto haltu i durante di e periodo di 7 pa 20
di febrüari 2022 a registrá lo siguiente.
Atrako
Den e e periodo ei tabatin kuater (4) registrashon pa loke ta atrako. Mayoria di e atrakonan
aki a tuma lugá entre 21.00’or i 22.15’or durante di siman. E malechornan a konsentrá den
e área di Skèrpènè, Roi Santu, Otrobanda i Grimou. Dos di e atrakonan aki tabata riba kaya,
unu den kas i unu den negoshi.
Un di e atrakonan aki a keda kometé pa un kuarteto ku tabata kore den un outo di marka
Kia den e área di Montaña.
E shofùr di e Kia lo a dal parti patras di e outo di e víktima. Na momentu ku esaki a baha,
nan lo a atrak’é.
Petishon na tur siudadano pa ta alerta ku e forma di tira atrako aki.
Ladronisia di vehíkulo
Den e periodo di dos siman menshoná aki, tabatin kuater (4) kaso di ladronisia di vehíkulo.
Mayoria vehíkulo a keda hortá riba djamars i djaweps entre 21.00’or i 23.30’or i 00.00’or i
05.00’or. E área kaminda mas vehíkulo a keda hortá, ta Buena Vista i nan tabata
vehíkulonan di aña di fabrikashon entre 2007 pa 2011.
Tres di e vehíkulonan aki ku a keda hortá, ta di e marka Mitsubishi.
Kiebro den kas
A registrá 12 kiebro den kas i mayoria a tuma lugá riba djaweps entre 10.00’or i 17.00’or.
Malechornan a bishitá e barionan manera Tra’i Seru, Oude Water, Groot Kwartier i Buena
Vista.
E individuonan a penetrá den mayoria kas dor di sea kibra of fòrsa porta di kas di patras.
Kiebro den negoshi
Polis a tuma den e periodo aki 16 denunsia di kiebro den negoshi.
E kiebronan aki tur a tuma lugá entre 03.00’or i 05.00’or dor di fòrsa bentana di e edifísio.
Mayoria di e kiebronan aki a tuma lugá riba e djabièrnenan.
E áreanan na unda e kiebronan aki a tuma lugá tabata hopi variá, esta for di Montaña Rey
te Kenepa.
Den e 16 negoshinan aki, tin 3 skol tambe ku e bira víktima di ladronisia.
Kiebro den outo
Tabatin tres (3) kiebro den outo, ku a tuma lugá riba e djabièrnènan entre 03.00’or i
05.00’or.
E método ku malechornan a usa tabata sea pa fòrsa of kibra e bentana di porta na man
drechi patras di e vehíkulo.
Tur e kiebronan aki a tuma lugá na playanan of na áreanan turístiko.
Violensia relashonal
E periodo tras di lomba tabatin 16 kaso di violensia relashonal, di kua mayoria a tuma lugá
den fin di siman.
E gran kantidat di yamadanan ku polis a haña pa atendé e kasonan aki, tabata entre
20.00’or i 21.00’or.
E áreanan kaminda ku polis mester a duna asistensia pa e tipo di violensianan aki, tabata
práktikamente rònt Kòrsou.

This site uses Akismet to reduce spam. Learn how your comment data is processed.

%d bloggers like this: