Minister Pietersz- Janga a duna inisio na proyekto Mental Health Gym
Minister Pietersz- Janga a duna inisio na proyekto Mental Health Gym
Willemstad – Resientemente Minister di GMN dr. Dorothy Pietersz- Janga na e kompleho deportivo nobo di Mari Pampun a duna inisio na e proyekto Mental Health Gym. Ta un proyekto ku PSI – Skuchami a prepará spesial pa su klientenan i pronto lo start e proyekto aki na Banda Abou tambe pa klientenan di Banda Abou i bisindario. Proyekto Mental Health Gym ta proyekto ku ta kombiná tratamentu mental ku ehersisio físiko. E kombinashon aki a mustra di ta duna bon resultado i den a kuadro aki Pan American Development Funds ta interesá pa sostené e proyekto finansieramente.
Minister Pietersz- Janga a kuminsá su diskurso bisando “Porfin”. Pasobra pa años kaba Minister komo dòkter ta promové moveshon i ehersisio serka su klientenan. Pues awor ora klientenan aserká PSI – Skuchami pa ayudo, despues di un intake ekstenso lo por inkorporá e parti di ehersisio físiko tambe den e trayekto di tratamentu. Finalmente Minister a felisitá personal di su ministerio, PSI – Skuchami i Pan American Development Funds pa kolaborashon.
Despues di e parti ofisial tabata un bon momentu pa hasi un tiki ehersisio. Tur ku tabata presente a posishoná nan mes riba e kancha di e kompleho deportivo i bou di guia di profeshonalnan di PSI-Skuchami sikólogo Hedya Colastica i SPV-er alabes instruktor di fittness Bertier Magdalena a hasi algun ehersisio leve pa los e muskulonan i a duna inisio na e proyekto Mental Health Gym den bario di Mari Pampun. Pa mas informashon bishitá: facebook.com/MinistryofHealthCuracao
Riba potrèt 1: momentu di diskurso di Minister Pietersz- Janga.
Riba potrèt 2 i 3: momentu ku tur presente a hasi ehersisio leve pa los e muskulonan.
Riba potrèt 4: momentu ku señora Colastica a hasi entrega ofisial di un manual di ehersisio na Minister Pietersz- Janga. Drpd: Maya Baroud (PADF), Logan Coleman (PADF), Hedya Colastica (sikólogo PSI –Skuchami), Bertier Magdalena ( SPV-er/ Fitness instructeur) Minister Pietersz-Janga, Raymond Mari (presidentie direktiva PSI-Skuchami) Angelica Dijk (Direktor PSI- Skuchami).
