Minister Xiomara Maduro a corona Miss & Mr. Turismo International Gay Aruba 2022
Minister Xiomara Maduro a corona Miss & Mr. Turismo International Gay Aruba 2022
ORANJESTAD – Recientemente, Minister di Cultura Xiomara Maduro a corona tres representante cu lo participa den e certamen di Miss & Mr. Turismo International Gay Aruba 2022, cu a keda den persona di Natazha Granada, Gonzalo Restrepo y Allan Kock.
Tabata un bunita anochi cu a cuminsa cu presentacion di cada representante cu a mustra nan amor pa nos pais atraves di presentacionan cu musica den nos idioma Papiamento y trahenan tipico mustrando asina e importancia cu cultura tin den e evento aki.
E evento a sigui cu un presentacion di Edjean Semeleer cu a canta algun cantica popular cu sigur a duna un toke special na e anochi aki. Despues, e publico presente a haya e oportunidad pa conoce cada representante di cerca. Finalmente, minister Maduro a haya e honor pa corona cada un representante cu tin e bunita tarea pa participa den e certamen di Miss & Mr. Turismo International Gay Aruba 2022 representando nos pais.
Minister Maduro ta gradici e organisadornan pa e invitacion na e evento unico aki caminda cu e amor pa Aruba a resalta den cada presentacion. Alabes minister Maduro ta gradici nan pa a dune e oportunidad pa corona cada un cu lo representa nos Pais y ta deseanan tur clase di exito cu nan presentacion den exterior. Minister Maduro tin tur confiansa cu nan lo sa di representa nos pais dignamente den e certamen aki.