FUNDASHON FUNDITUT SELEKTÁ PA IMPLEMENTÁ FASE 2 DI ‘UN KOMIENSO NOBO’

MINISTERIO KONSERNÍ HUSTISIA

 

FUNDASHON FUNDITUT SELEKTÁ PA IMPLEMENTÁ FASE 2 DI ‘UN KOMIENSO NOBO’

PUBLIKÁ RIBA 16 MART 2022

d.r.p.d. sra. Juliana Frederick(trahadó finansiero Funditut), Ottmar Fayente (director Funditut), sra. mr. Desiree Lai-Promes (Sekretario General), Mariela Thode (trahadó finansiero) i Sachalyn de Sousa (programa manager di proyekto un komienso nobo)

 

WILLEMSTAD – Di akuerdo ku un kombenio firmá ku Hulanda, Gobièrnu di Kòrsou, ta karga e responsabilidat pa ehekushon di e di dos fase di e proyekto “Un Komienso Nobo” ku ta e asina yamá ‘Leerwerk trajecten’ (LWT). E trayekto akí ta brinda e oportunidat pa siña un fishi di forma práktiko bou di guia intensivo. Djaluna 14 di mart último, a firma e kombenio di finansiamentu entre Fondo di Kriminalidat i Funditut, e organisashon ku a gana e destaho públiko pa ehekushon di e proyekto akí.

E trayekto pa buska un organisashon ku por ehekutá e ‘Leerwerk trajecten’ a inisiá for di dia 27 yanüari di e aña akí. Organisashonnan interesá mester a entregá un plan di ehekushon i un presupuesto. Un total di 12 di e proyektonan ku a keda entregá por a sigui den e destaho públiko. E tim enkargá ku e destaho públiko riba dia 16 febrüari 2022 a evaluá tur e organisashonnan a base di kriterionan fihá den e ‘programa van eisen’.

E organisashon ku a risibí mihó puntuashon durante e destaho, a resultá di ta Funditut. Dia 23 febrüari último e tim enkargá ku e destaho públiko a informá tur e organisashonnan ku no a gana e destaho di esaki i alabes a informá Funditut ku el a skor mihó i ku e tim lo proponé e fundashon komo esun enkargá ku ehekushon di e LWT pa Gobièrnu. E resultado di e `gunningsadvies` a keda firmá dia 1 di mart i presentá na Konseho di Minister djárason último. Despues di esaki a informá Funditut ofisialmente ku e la gana e destaho públiko.

Mirando eksperensianan di pasado ku trayektonan similar, a skohe e biaha akí pa repartí e kostonan entre e tres ministerionan ku a uni forsa pa realisá e proyekto akí i a opta pa laga Fondo di Kriminalidat atministrá e presupuesto di e proyekto den su totalidat konforme e plan di ehekushon ku a keda aprobá dia promé di desèmber 2021 den Konseho di Minister. Gobièrnu di Kòrsou ta gradisí tur e organisashonnan ku a mustra interes pa e proyekto aki i ta konsiente ku e organisashonnan aki ta hasiendo un bon trabou na bienestar di e grupo di enfoke aki na Kòrsou.

Share this page to Telegram

This site uses Akismet to reduce spam. Learn how your comment data is processed.

%d bloggers like this: