Eksitoso interkambio deportivo entre Boneiru i Kòrsou den waterpolo na Kòrsou

Eksitoso interkambio deportivo entre Boneiru i Kòrsou den waterpolo na Kòrsou

 

Despues ku tres siman pasa Kòrsou a interkambiá na Boneiru ku e kategorianan di U12 i U14, den e fin di siman di 25 pa 27 di aprel 2022 e ekipo di waterpolo di Boneiru, Barracudas, tabata na Kòrsou pa un interkambio deportivo den waterpolo ku Swim Club Orca Curaçao (Orca).

 

Djabièrnè e aktividat a tuma lugá na Pisina Bennie leito;

Orca U12, e partido aki a kana bon i a hunga tres periodo. Aki e atletanan di Orca a sa di gana e partido aki ku skor di 11 pa 2. Orca a dominá e partido.

 

Orca U14, e partido aki tabata hopi kayente i despues di pèrdè dos wega na Boneiru tres siman pasa, e atletanan di Orca a trein duru i a sa di gana e wega aki 9 pa 7. Bon wega, tur dos ekipo a duna tur ku tin.

 

Djasabra e aktividat a tuma lugá na Pirate Bay, Piscadera, dilanti di e pir di CARMABI. Aki a meks atleta nan di Boneiru i di Kòrsou huntu i traha dos tim di U12 i tres tim di U14 i laga nan drai un torneo èntrenan. U12,  kada tim a hunga seis wega di dos periodo i U14 kada tim a a hunga 8 wega di dos periodo. E dia tabata largu i pisa, pero fruktífero.

 

Djadumingu e aktividat a tuma lugá na Pisina Bennie Leito;

Orca U12, a hunga un partido di dos periodo i por a mira ku e atletanan di Boneiru a hasi nan esfuerso, pero Orca a sa di gana ku skor di 7 pa 0.

 

U14, Boneiru a apliká un strategia riba e tim di U14 di Kòrsou i a sa di dominá Kòrsou sigur pa gran parti di e wega. E wega tabata kayente atrobe. Bon wega bringa di parti di tur dos ekipo. Barracudas a sa di gana e wega ku skor di 9 pa 6.

 

Den e fin di siman di 01 pa 03 di aprel U16 i U19 di Orca ta bai Boneiru pa interkambia ku Barracudas.

Direktiva di Orca ta gradisí tur atleta pa nan komportashon i prestashon, mayornan ku a yuda durante di e aktividat aki, atletanan di Orca waterpolo señor ku a supervisá riba djasabra i a flùit e weganan ofishal,  coachnan i Orca su “jeugdtrainer” nan ku a drai e programa di djasabra kompleto i a coach e tim di U12, personanan ku ta sostené i yuda direktiva di Orca, danki pa e gran trabou ku nan tur a desplegá durante di e aktividat. Boso a hasi un tremendo trabou. Danki na e spònsernan ku ta hasi posibel tur loke Orca ta organisá i hasi pa nos hóbennan di Kòrsou.

Direktiva ta hopi gradesido na boso tur!!!!

Atentamente,

­­Vernon Toré
Presidente di Swim Club Orca Curaçao

Tel: 529 6586

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: